In ‘ne volle zaal “Pejjerhaof”, ruum bezatj mit deilnummers van de versjillendje sjoale, aojers, opa’s en oma’s, lieërkrachte en anger belangstèllendje, is vriedigaovendj 8 april de ieëste regiofinale van de declamatiewedstried van Veldeke Krink Ech gehaoje. Det woor ‘ne sfeervolle, mer ouch spannendje wedstried. De deilnummers hawwe op hun eige sjoal al ’n selectie doorstange en kóste zich noe maete mit kènjer van de anger sjoale in “groat Ech”. Mer presentatrice Patricia Beyer perbeerdje ze allemaol op hun gemaak te stèlle en ’t enthousiasme ruum kans te gaeve. De moeilikste taak woor aan de jury óm te bepaole waem zien gekaoze gedich toch ’t bèste haw väörgedrage. Oeteindelik koom dao de volgendje oetslaag oet:
Groep 3-4
1. Kampioen van Ech, teves kampioen van ’t Smaalste Stökske:
Zef Gerelings, BS Angela – gedich: ”Häörkes knippe”
2. Sem Wilms, BS Patricius, Pej – gedich: ”De slekke”
3. Lorena Coenen, BS Keuningshöfke, de Boesj – gedich: ”Zomer” *
Groep 5-6
1. Kampioen van Ech, teves kampioen van ’t Smaalste Stökske:
Laura Idema, BS de Violier, Ech – gedich: ”Jojoë”
2. Suze Golsteijn, BS Patricius, Pej – gedich: ”Sterre plökke”
3. Jip Thissen, BS de Violier, Ech – gedich: ”Mien oma”
Groep 7-8
1. Kampioen van Ech, teves kampioen van ’t Smaalste Stökske:
Lorena Iedema, BS de Violier, Ech – gedich: ”Op jach”
2. Emma Willekens, BS Angela, Ech – gedich: ”De lèste kieër” *
3. Lynn Wilms, BS Patricius, Pej – gedich: ”Op jach”
* Zelf gemaaktj gedich
Totaal wore d’r 32 finaliste; de anger deilnummers op de 5 sjoale mitgetèldj, höbbe zo’n 80 kènjer aan de wedstried mitgedaon. Dao-oet is volges de organisatie gebleke det de kènjer nao 2 jaor óngebraeking es gevolg van de coronabeperkinge, blie wore det de declamatiewedstried d’r weer woor.
Nao ’t bekèndj make van de resultate waerdje de prieze oetgereiktj door ieëre-väörzitter Ton van Wegberg van Veldeke Krink Ech same mit de väörzitter van de wirkgroep Ruud Roumen en de juryväörzitter Frans Essers. De wènnieërs van de 1e plaatse krege nog ’n extra attentie en waerdje oetgerope tót kampioene van ’t Smaalste Stökske van Nederlandj. Dit haw de organisatie gedaon, ómdet dit jaor nog gein Limburgse finale kan zeen, wo gebroekelik die wènnieërs aan mit moge doon.
foto’s: Geert Janssen