Vanaaf dit jaor haetj oze Krink ’n eige blaad, ’t Veld(j)eke Bekèt. Det is d’r gekómme naodet gebleke woor det ein gezamelik blaad mit de anger cultuurhistorische vereniginge in de gemèndje d’r (nag) neet in zoot.
’t Bestuur woor al langer van meining det ’t jaorliks programmabeukske väör väöl leje jaomer genóg ’t ènsigste woor waat ze van de krink zoge. Det woor eine te smale basis óm te kènne spraeke van good contact.
Mit ’t kwartaalblaad Veld(j)eke Bekèt weurtj geperbeerdj dao verangering in te brènge. De leje kriege vanaaf noe veer kieër per jaor ’t blaad mit informatie äöver oze krink: de activiteite die staon aan te kómme in de dao-op volgendje maondje, en verslaegskes vanne activiteite die al gewaes zeen. D’r zólle ouch foto’s geplaatsj kónne waere. Verder is ’t de bedoeling det mit dit blaad ’n meugelikheid weurtj gebaoje aan leje die get in oos dialect op pepier gezatj höbbe, óm det angere te laote laeze.
De naam Veld(j)eke Bekét zal vas bekèndj inne oare klinke: de naam (Hendrik van) Veldeke zitj d’r in, want dae is ouch verbónje aan oze krink, en det Bekèt sluitj op die versjeijenheid aan artikele die bedoeltj zeen óm de leje oppe huuegdje te haoje waat d’r zao-al op ’t veldj van oos vereniging loos is.
