De pries van de Veldeke Krink Ech is woonsdigaovendj 25 aug. oetgereiktj aan Marjo Jaski-Verheesen väör zien biedrage aan ’t Veldekeprogramma, speciaal in de corona maondje. Ómdet ’t Veldekebestuur mit dae pries waardering wiltj oetdrökke väör minse – leje of neet-leje van de vereniging – die mit ’n bezunjer idee kómme en ouch mithelpe óm dao get van te make, haet de pries de naam “Aanpakker” gekrege.
De “Aanpakker 2021” kreeg Marjo Jaski väör zien idee óm in de periode det minse, en väöral de aojer minse, noadgedwónge thoes móste blieve, get aafwisseling te beje door middel van väörgelaeze dialectverhaole. Veldeke Krink Ech haet die verhaole verzameldj van leje en anger sjrievers, en soms hertaaldj in ’t Echs. Daonao oppe website geplaatsj zoadet m’n ze via computer of laptop kós beloestere. Kán beloestere mótte w’r zègke, want ’t Verhaole Project van VKE löptj nog stieëds. Al mieë es 60 verhaole! Ingedeildj in versjillendje categorieë: historie, volkscultuur, natuur, belaevenisse, allerlei en gedichte. De meiste van die verhaole zeen ouch door Marjo Jaski-Verheesen ingespraoke.
De oetreiking vónj plaats aan ’t ènj van ‘ne geslaagdje Veldeke-aovendj wo-in versjillendje van de verhaole oet ’t project waerdje väörgelaeze, dees kieër door de sjrievers zelf.
’t Is de bedoeling deze pries jaorliks toe te kènne aan emes dae zich verdeenstelik haetj gemaaktj väör de Krink.
