Kómmendje maondig, 19 juni óm 16.00 oer, zal weer väörlaeze zeen väör jóng kènjer in de bibliotheek/laeswinkel aan de Bovenstestraot 11 in Ech.
’t Väörlaeze op de 1e (Nederlands) en 3e (Limburgs) maondig in de Bieb gebäörtj in ’t kader van de ‘Boekenschatkist’, ’n projek laesbevordering en taalóntwikkeling. Want laeze is belangriek en väörlaeze aan jóng kènjer is de ieëste stap. De Bokesjatkis in de Laeswinkel/Bieb geitj op beide maondigge aope van 16.00 tót 16.30 oer. Aojers, of groataojers die mit kómme, kènne mit loestere, mer eventueel ouch intösse röstig zelf ’n book oetkeze. Kómme loestere is gratis.
Vanaaf 16.00 oer zal den ’ne vriewilliger van Veldeke Ech in de Laeswinkel/Bieb present zeen óm aan de kènjer ’n half uurke väör te laeze. Kènjer van 4 tót 7 jaor zeen van herte welkom óm te kómme loestere nao de verhaole van Boer Boris en anger avonturiers. Tót noe toe is d’r nog mer ’n klein aantal vaste toehuuerders. Die volge vol aandach alle verhaole en bekieke de sjoan plaetjes in de beuk. Soms höbbe de väörlaezers van Veldeke dao nog ’n kluuerplaat of knutselwerkske bie.
