De nuuj kènjerkrantj väör jeug van de basissjoale in Ech-Zösterte en Maasgouw is ’n gewuuen, dus nederlandstalige gezèt, mer dreug es titel: “Ós Blaedje”. Daomit is dudelik det ze ouch aandach wille sjinke aan ’t dialek, baeter gezag: de Limburgse taal.
In ’t ieëste nummer is det good te merke. Op ’t väörblaad en al hieëlemaol op bladzijde 10 zeen Inez en Thomas aan ’t waord, wènnieërs van de Provinciale finale van de Veldeke declamatiewedstried. In ’n gesprek mit hoofdredacteur Hanneke Drohm en Ruud Roumen, de väörzitter van de declamatiewirkgroep van VKE kriege zie de kans óm aan te gaeve waat ze van oos dialek vènje. Det gesprek is ouch opgenómme in de editie die de kènjer van Remunj en Roerdalen höbbe óntvange.
In de kènjerkrantj stuitj nog väöl mieë te laeze. ‘t Is ’n initiatief van de huidige redactie ómdet ze vènje det genóg óngerwerpe zeen die äöver kènjer gaon of die kènjer gaer wille laeze, of wo ze bès waal hun meining äöver wille gaeve, mer die ze in anger krantje neet taege köms. Dit krentje weurtj versprèdj via de basissjoale, groep 5 t/m 8 en versjientj 8 x per jaor; in november a.s. ’t volgendje nummer. De oetgave weurtj mäögelik gemaaktj door subsidies van de betreffende gemèndjes, de provincie Limburg, bedrieve en instèllinge. Hun doel is: kènjer aan ’t laeze kriege en haoje.
