De traditioneel kersvering van Veldeke Krink Ech wiekt dit jaor aaf van väörgaondje jaore.
’t Bestuur haetj gedach dees activiteit eerder in december en ’n bietje boete de drökdje van de kersdaag te haoje. Daoróm weurtj ‘t ‘ne Adventsmiddig. Op dae middig kómme toch de óngerdeile aan bod, die de leje van eerder jaore gewèndj zeen: meziek, väördrachte en get te aete. Väör de meziek höbbe w’r deze kieër ’n zangkoar oetgenuuedigdj. Ze neume zich “Bie-eingeraaptj”, mer es g’r det get negatief zótj vènje klinke, det zeen ze zeker neet!
Allemaol manne (en ein dame!) die lid zeen van ’n zangkoar, mer dit saort optraejes d’r nog bie doon. In ’t ieëste deil van hun optraeje zólle ze ’t in de sfeer van Advent en Kersmis haoje, mit dao tösse ‘n paar väördrachte.
In ‘t twieëdje deil – nao de pauze – geitj ‘t koar äöver op stömmige meziek, dae g’r vas zöltj herkènne. Vanaaf de pauze zólle, gesprèdj äöver de middig, klein gerechjes waere geserveerdj.
Deze middig vuntj plaats in de fieëstelike aangeklèdje zaal van de Pejjerhaof. Ouch is weer ruumdje väör leje die get wille laote huuere. Gaeftj det den waal estebleef van teväöre door, zoadet d’r ’n indeiling en volgorde kan waere gemaaktj.
Väör ’t deilnumme aan deze middig dene de leje zich väöraaf op te gaeve en betale. De koste zeen 25 euro väör leje; 30 väör introducees. Daobie is tieë of kóffie väör de ganse middig inbegrepe; anger consumpties zelf aaf te raekene (penninge). Väör aanmelje wie gebroekelik ’t bedraag äövermake of bezörge. Raekeningnummer van VKE en eur lidmaatsjapsnummer stuitj achter op ’t lèste nummer van Veldeke Bekèt. Aanmelje kan tót uterlik 5 december.
Adventsmiddig op zóndig 15 december in de Pejjerhaof van 15.00 – óngevieër 18.00 oer.
