Oos plat ouch in Pej oppe straot

Vanaaf de lèste vernujing van ’t Echter winkelcentrum – de Bäövestestraot, Ursulinestraot en ómgaeving – in 2012, ligke dao 31 tegels in de bestraoting mit spreuke in oos dialek. Bie ’t Cultuurhoes oppe Plats is daovan nog altied ’n wanjelroute mit besjrieving en oetlèk te kriege.

Noe de kómmendje jaore ’t centrum van Pej oppe sjöp geitj en dao mit väór en nao ouch straote vernuudj waere, haet Veldeke same mit de Klankbordgroep Groat Pej ’t initiatief genómme óm ouch dao ’n vergeliekbaar projek mit spreuke te realisere. Ouch dao wille w’r spreuke, oetdrökkinge en zèkswieze, die typisch zeen väör Pej of de locatie ’n plaats gaon gaeve. De gemèndje haet de mitwèrking dao-aan al toegezag. Noe de spreuke nog!

Veldeke Krink Ech reuptj ederein dae dao ideeë väör haetj op óm die aan ós door te gaeve. Die spreuke kènne betrèkking höbbe op de kerne Pej, Sjaelberg, ’t Hènge en de Slek. Ouch in die anger kerne van “Groat Pej” zeen de aafgeloupe jaore al straote opnuuj aangelag. De spreuke kènne get zègke äöver ’n bepaoldj pandj of ‘ne winkel dae dao gelaege haetj, op kirk- of patronaatsómgaeving, op ’n typisch Pejjer vereniging enz. De organisatie lieëtj zich gaer verrasse door eur kènnis en kreativiteit. De jury oet Veldeke en de Klankbordgroep zal oeteindelik de keuze make, want d’r is natuurlik ’n grens aan waat ’t moog koste.

Stuur eur ideeë väör ’t plat oppe straote in groat Pej bönnekort op nao Theo Bougie, penningmeester@veldekekrinkech.nl of aan Piet Aben, piethmaben@gmail.com. Weer haoje uch oppe huuegdje.

Reageren is niet mogelijk