Echter Dictee weurtj korter

De ieëste digitale versie van ’t Echter Dictee is good óntvange. Vrie algemein vónj m’n ’t aevel te lank. Daomit is al raekening gehaoje bie ’t dictee waat noe aangebaoje weurtj: minder zinne en korter zinne. De deilnummers moge ouch bès kóntent zeen mit de resultate, want ’t aantal foute veel bès mit. Dao-op haet edere deilnummer ’n persuuenlike trökkoppeling gehadj. Op die meneer geitj ’t neet óm de foute, mer óm d’rvan te lieëre en de volgendje kieër baeter te doon.

Vanaaf kómmendj dictee is ouch mäögelik ’t dictee in Boesjer dialek te make. Bie begin van ’t dictee kan m’n aangaeve of m’n in Echs, Zösters of Boesjer plat wiltj sjrieve.

’t Nuuj dictee dreug es titel: “Ech-Zöstere, 75 jaor vrie”. ‘t Dictee woor bedoeldj väör 2020, mèr kós toen vanwaege corona neet doorgaon. Ederein dae det wiltj kan noe dees digitale oefening thoes op de computer make. Klik daoväör hie ónger op de link en den kömp se vanzelf in ’t dictee-formulier. Dao kan m’n ouch aangaeve of m’n mit naam en/of emailadres in de scorelies witj waere opgenómme.

Vervolges kan m’n de zinne sjrieve. Die waere regel väör regel väörgelaeze. De deilnummer typtj de teks d’r ónger. Door op ’n pielke te drökke kan m’n de teks versjillendje kieëre opnuuj beloestere. D’r is dus genóg tied.

Wae det wiltj, kan zien dictee aan ’t ènj ouch insture en laote naokieke. Det gebäörtj den automatisch. Väör spelling gebroektj ‘t programmaj de spelling van Veldeke, zoa es die te vènje is in ’t Brónsgreun Beukske, editie Echt-Susteren en in de Zösterse Kal. Edere deilnummer krig p’r email ’n berich mit ’n documènt wo-op te zeen is waat allemaol good of fout woor. Zoadet bie ‘ne volgendje kieër mitdoon ’t vas en zeker nog baeter geitj. Want dao geitj ’t óm: in spelendje vórm bezig zeen mit de Limburgse taal. D’r zeen gein groate prieze te wènne.

Ónger aan ’t dictee is de mäögelikheid óm opmerkinge te make. ’t Streve is, gebroek makendj van de ervaringe en reacties, maondjeliks of twieëmaondjeliks ’n nuuj dictee aan te beje. Klik op de teks “Echter Dictee” ónger de foto óm nao ’t dictee te gaon!

“Echter Dictee”