De bös väör ’t jaorlikse oetstepke van Veldeke Krink Ech – dit jaor nao de Vlaamse stad Leuven – is vol. Opgaeve hieväör kan dus neet mieë.
Toch effe get informatie äöver deze trip:
Wie gebroekelik vertrèkke w’r van de Nuje Mert in Ech óm nege oer. Dao aangekómme beginne w’r mit ’n tas kóffie of thee mit vlaai in ’t gezellige restaurant “de Klimop”, taegenäöver de historische statie aan ’t Martelarenplein. Van hie loupe w’r same nao de Groate Mert, wo gidse ós staon op te wachte bie ’t awd stadhoes. Mit gidse wanjele w’r daonao door ’t centrum van Leuven en bekieke of bezeuke o.a. de Sint Pieterskirk (net wie ’t stadhoes ’n hoagtepuntj van de gotiek), de Lakehal, de universiteitsgeboewe en kroege aan de Aoj Mert. Door klein sträötjes en steegskes gaon w’r nao ’t groat Begijnhof, door Unesco oetgerope es waerelderfgood. De róndjleiding eindigtj weer op ’t Martelarenplein, trök bie ’t restaurant väör de gereserveerde lunch. M’n kan aevel ouch ’n anger plek zeuke. W’r vraoge uch det väöraaf dudelik aan te gaeve in verbandj mit ’t reservere.
’s Middigs óm 3 oer bezeuke w’r Histauruz, ’t museum van ’t ziekehoes. Det is get speciaals, wo m’n gewuuenlik ouch neet kömtj. Nao ’n oetlik in de kepel kriege w’r ‘n róndjleiding in groepe. ’t Is neet väör te stèlle waat dao allemaol aan aw mesjiener en instrumènte stuitj, waat same door ziekenhoes en universiteit bedach is. Es aafsloeting drènke w’r nog ’n tas kóffie of get anges, väördet w’r óm 18.00 oer weer in de bös stappe väör de trökreis nao Ech. Róndj zeve oer zeen w’r den weer op ’t vertèkpuntj.
Väör dees reis mót m’n zich väöraaf aanmelje, zoadet w’r consumpties, gidse en lunch good kènne aafspraeke. Aanmelje kan door per bank te betale, ónger opgave van naam en lidmaatsjapsnummer. Óf mit de bón die in ‘t Veldeke Bekèt zitj.
’t Bestuur treftj waem mit geit, gaer in de bös op vriedig 29 juni, óm 09.00 oer oppe Mert in Ech.
