Aanmelje väör oos oetstepke kan nog zoalang d’r plaatse vrie zeen in de bös. Die bös brunk ós op vriedig 7 juli a.s. nao noord Limburg en de grens nao Braobantj. W’r bezeuke smörges ieës ’t Limburgs Museum in Venlo. Nao kóffie mit vlaai bezeuke w’r in 2 groepe aafwiselendj de vaste collectie (mit o.a. de gouje muntje en ‘t “Paerdje” die get jaore geleje oppe Slek zeen gevónje) en ’n nuuj tentoanstèlling mit es titel: “De Zonnekoning van Oranje – slaags aan de Maas”. Die tentoanstèlling, mit exclusieve stökke en documente oet Versailles, is op 9 juni j.l. door Käöning Willem-Alexander geäöpendj. Gidse zólle ós hie oetlèk gaeve.
Smiddigs gaon w’r nao ’t Toon Kortoomspark bie Deurne. Dao gebroeke w’r ieës ‘ne passendje lunch: “Mijn kinderen eten turf”. Daonao ’n demonstratie turfstaeke en bezeuk aan ’t Toon Kortooms museum, aafwisselendj in twieë groepe. In ’t klein museum is informatie äöver de bekèndje Braobantse sjriever, wo väöle van ós waal ’n book van gelaeze zólle höbbe (Mijn kinderen eten turf, Beekman & Beekman, Mijn Oom Theodoor, etc.).
Óm half zès verzamele w’r weer in de bös väör de trökreis nao Ech. Dao verwachte w’r óm 18.30 oer aan te kómme.
Opgave väör dit oetstepke kèntj door 60 euro p.p. äöver te make op de raekening van VKE bie oze penningmeister, weer mit vermeljing van eur lidnummer. Raekeningnummer en lidnummer staon oppe achterkant van eur Veldeke Bekèt. Aanmelje kan tót 1 juli of tót de bös vol is. Introducees kènne mit es nog plaats is; zie betale 65 euro.
Jao, ’t oetstepke is weer ’n paar euro duurder es väörig jaor, mer g’r begiptj waal wodoor. Dao is den waal alles inbegrepe: bösreis, tas kóffie mit vlaai, entrees, lunch.
Lètj op: trök betale bie neet mit kènne gaon is neet vanzelfspraekendj! De koste zeen den al gemaaktj en de bös bliftj aeve duur, ouch mit ‘ne persoan mieë of minder. Baeter is óm bie ónverwachdje verhinjering óm mit te gaon, emes anges in eur plaats te vraoge.
De bös vertrèktj op 7 juli óm 09.00 oer vanaaf de Nuuj Mert. Zoaget half zeve zeen w’r weer trök in Ech.
