Op de op 13 februari j.l. gehaoje algemein lejevergadering (Jaorvergadering) is ’t secretariaat van Veldeke Krink Ech officieel äövergadrage van Miel Coenemans nao Magna Bedaf-Willems.
Mit ’t aantraeje van ‘ne nuje secretaris numme w’r aafsjied van Miel Coenemans, dae 8 jaor bestuurslid en secretaris is gewaes. Ruum oppertied haet Miel aangegaeve väör ’n volgendje periode neet mieë besjikbaar te wille zeen, wodoor ’t bestuur kós gaon oetkieke nao opvolging. Bie zien besloet haet väöral ’t streve nao verjónging bönne de krink en in ‘t bestuur ’n groate rol gespeeldj.
Miel haet zien werk bie Veldeke altied good en mit väöl inzèt gedaon. Hae woor ‘ne stipte secretaris dae de zake gaer tót in de puntjes geregeldj haw. Daoväör is bie zien aafsjied door de väörzitter väöl waardering oetgespraoke.
De nuje secretaris, Magna Bedaf-Willems woontj op St. Joas en is dao bie gemeinsjap en verenigingslaeve betrokke. Veldeke dènktj in de persoan van Magna ’n kundig, betrokke en jónger bestuurslid te höbbe gevónje. W’r wènse häör ‘ne sjoane tied in ’t bestuur van VKE.
