Väör de corona-óngebraeking haetj VKE vief kieër ’n z.g. poëziewanjeling gehaoje in versjillendje kerne en in samewirking mit de Sjrieverskrink en de lokale heemkunde. Det woor ’n geleefdje activiteit, want de deilname woor good. Gevraogdj waerdje nao vervolg.
Mer neet eder kern bleek daovaör gesjiktj. Nuuedig is ’n aantal bezunjer lokasies, die in ’n aaneingeslaote rundje wanjele van zoaget ’n oer te bezeuke zeen. Daoróm höbbe w’r ós get nuuts laote invalle: de Zomeraovendj! Ouch mit get wanjele, ouch mit gedichte en meziek en haopelik ouch mit sjoan zomeraovendjwaer.
De ieëste zomeraovendj woor geplandj in 2020. Det weurtj noe 2022! Dae aovendj organisere w’r, same mit vertegewoordigers van de St. Joaster gemeinsjap, op dónderdig 8 september. Lekker ’n stökske wanjele door ‘t dörp, langs 4 markante lokasies, mit meziek en sjoan gedichte. En daonao nog ’n gezellig vervolg in ’t Patronaat, mit o.a. amusement van St. Joaster artieste. De activiteit is den ouch neet bedoeldj väör allein leje van Veldeke. Ouch de minse van St. Joas zeen van herte oetgenuuedigdj en welkóm!
De aovendj zal dus oet twieë gedeiltes bestaon.
W’r starte mit ’n wanjeling nao De Wei, De Bokkeriejer, De Theresiakapel en De Kloasterhaof, neet persé in die volgorde. D’r zal geloupe waere in 4 groupe van eder zoaget 20 persoane, zoadet de väördrachte ouch good te verstaon zeen. Op eder plek haetj ‘ne deilnummer van de Sjrieverskrink Midde-Limburg gezörgdj det d’r ’n speciaal väör die lokatie gesjreve gedich is óm dao väör te drage, aafgewisseldj mit ’n sjoan stökske meziek van St. Joaster muzikante.
Nao de pauze zal ’t twieëde gedeilte van de aovendj plaatsvènje in ’t Patronaat. Dao zal es vervolg ‘n ’n gevarieerdj programma zeen, ouch mit meziek, beeldj en verhaole.
Óm zich te höbbe op ’t aantal deilnummers is aanmeljing väöraaf nuuedig. Det kan door € 4,- p.p. äöver te make op de raekening van VKE: NL65RABO 0138 6319 64, mit vermeljing van naam en aantal deilnummers. Hieväör krig m’n nao ’t wanjele in de zaal ’n consumptie. Móch ’t maximale aantal van 80deilnummers bereiktj zeen den kriege de te-laat kómmers vanzelfspraekendj hun geldj trök. De angere kriege verder gein berich, mer waere verwachtj.
De samekómst is óm 19.15 oer bie de kirk in St. Joas; alle 4 de groepe vertrèkke dao tegeliek – mer in ’n anger richting – óm 19.30 oer.(bie slech waer, ’t Patronaat).
Belangriek is dus oppertied aan te melje door ’t äövermake van ’t gevraogdje bedraag. Det kan vanaaf noe al tót uterlik 1 september.
