Al hieël get leje van VKE höbbe zich aangemeldj väör ’t bezeuk aan de Echter Revue “Ech, boete-spel” op zóndigmiddig 6 april vanaaf 14.00 oer in ’t Euro Detach Tejater. Nog neet aangemeldj? Den kèntj g’r dit alsnog doon door € 13,50 per kaart äöver te make op oos raekeningnummer bie de penningmeister (kiek daoväör achter op ‘t Veldeke Bekèt) mit opgave van eur lidnummer. Leje kriege toegang taege ‘ne gereduceerdje pries, allein geljig bie aanmeljing en betaling väöraaf. Nao betaling weurtj ’n plaats gereserveerdj; de kaart daovan krig g’r bie de entree van ’t theater.
De Echter Revue – editie 2025 – betruf ’n verhaol wo-in ruum 100 jaor trök weurtj gegange in de tied mit thema’s die in Ech speeldje róndj 1920. Zoa is d’r ’t ènj van WO I, de opkóms van de vrouwebewaeging, en de Spaanse griep. De zank, ’t Vriendenkoor, haw ambities väör ’n geweldig theaterstök. De intriges die zich aafspele róndj ’t realisere hievan kómme aan bod. Al mit al weurtj dees revue weer ’n wervelendje theatershow vol humor, zang en dans. Door eige minse op de bühne gebrach in ’n sjitterendj decor en mit prachtige kostuums.
