Op woonsdig 13 november organiseertj oze Veldekekrink weer ‘ne sjoane meziekaovendj in de sfeer van het “café chantant”, wie w’r det ’n aantal jaore geleje ouch gedaon höbbe. Daoväör zeen ouch noe bezunjer muzikante aangetrokke namelik de sopraan Margriet Laumen-Schlössels en de gitarist-arrangeur Ger Maessen. Same gaon zie dae aovendj ’n programma brènge mit Limburgse leedjes en ouch bekèndje melodieë oet opera en operette.
De combinatie van Margriet en Ger belaoftj weer eine sjoane muzikale Veldeke-aovendj te waere. Van herte oetgenuuedigdj!
Väör verder informatie kiek in ’t lèste nummer van Veldeke Bekèt of hie verder.
De sopraan Margriet Schlössels is gebaore in Einighausen en woontj in Remunj. Ze volgdje opleidinge solozang en sjoalmeziek aan ’t conservatorium in Mestreech. Woor jaorelank es “festes Mitglied” verbónje aan Die Vereinigte Städtische Bühnen in Krefeld en Mönchengladbach bie de oetveuringe van opera’s, concerte en musicals. Momenteel treutj zie nog regelmaotig op es soliste bie koare, blaosorkeste en anger meziekoetveuringe.
Gitaris en toetsenis Ger Maessen kömtj oet Zitterd mer woontj al jaore in Amsteraoj. Al mieë es 40 jaor begelèdj hae zengers, zangeresse en muzikante bie hun optraejes in kirke, bie concerte en anger evenemente. Bie VKE woor hae al eerder in 2018 es begeleider van de operazenger Math Dirks.
De toegang van deze meziekaovendj is gratis väör leje van VKE ómdet die jaorliks hun contributie betale. Introducees en anger belangstèllendje neet-leje betale 3 euro entree p.p.. M’n kan natuurlik ouch lid waere; gaontj daoväör nao www.veldekekrinkech.nl De aanvang is óm 20.00 oer, wie gebroekelik in de Pejjerhaof, Houtstraot 7 in Pej-Ech.
