W’r höbbe Esther van Loo, deskundig op ’t gebied van de Limburgse taal en taal in ’t algemein, besjikbaar gevónje de aovendj in november in te völle. Esther is ouch betrokke bie ’t Hoes van ’t Limburgs en de planne en activiteite die dao bestaon. Det zal ‘ne interessante aovendj waere; en zeker neet al te zwaor. Daobie zal de óntwikkeling van oos taal aandach kriege en ouch de vraog aan de orde kómme: haet ’t Limburgs toekóms? Weurtj ’t nog genóg gespraoke, door aojer minse en door jóngere? Wie belangriek is erkènning van ’t Limburgs es taal en wie wuud zeen w’r dao al mit?
Tösse de óngerdeile van de laezing zal Ad Gijzelaars de aanwezige in de stömming brènge mit Limburgse meziek en zólle get gedichte väörgedrage waere.
De aovendj vundj plaats in MFC de Pejjerhaof op woonsdig 18 november óm 20.00 oer. Aanvankelik woor dit thema geplandj op 25 november mer mós kómme te vervalle door ’t plotselinge sterve van Frans Walraven – awd väörzitter van Veldeke Limburg – dae väör ós die laezing zoe verzörge. Esther van Loo kós neet op dae datum; lètj dus aeve op es g’r det eerder al op eure kalender höbtj gezatj.
