Groat Limburgs Dictee!

Wie g’r aafgeloupe daag al versjillendje kieëre in de gezèt höbtj kènne laeze, geit Dagblad de Limburger same mit Veldeke Limburg ‘n “Groat Limburgs Dictee” organisere.
Waem mit wiltj doon aan dees wedstrijd mót de tekst “De warmte van de eigen taal”, die in de oproop in de Limburger stuitj aafgedröktj, ómzètte in zien eige dialek en den insture. Oet die inzendinge waere 30 minse geselecteerdj. Die 30 gaon op daensdig 12 juni a.s. in ’t geboew van de Media Groep Limburg (zèk mer ’t hoofkentoar van de gezèt) in Zitterd, mit ein de stried aan in ’n officieel dictee. Net wie bie ‘t “Groot Dictee der Nederlandse Taal” gebroekelik woor, waere ouch ’n aantal bekèndje Limburgers gevraog op dae aovendj mit te doon. Op die meneer weurtj oos Limburgs en zien dialekte óngewerp van ’n serieus spel en weer èns ónger de aandach gebrachtj.

Mitdoon is niet moeilik, mer ouch neet mekkelik! De jury hanteertj es richlien de Veldeke Spelling 2003. Mer ederein kan mitdoon in zien eige dialek, van zien eige plaats of dörp: Echs, Zösters, Brachs, Mofers, Boesjers enz. Dao oet weurtj de keuze van die 30 persoane gemaaktj.

G’r snaptj ’t al. Weer bevaele uch aan deil te numme aan deze wedstried, zeker es g’r ’n bietje plezeer höbtj in dialek sjrieve. Mit name degene die in de aafgeloupe jaore bie Piet Aben de cursus “Laeze en Sjrieve in ’t Limburgs” gevolgdj höbbe, zoewe hun kènnis van dialek en spelling noe èns kènne tuuene. Mer ouch zónger det: mit ‘t “Brónsgreun Beukske” kómtj g’r ouch al ’n hieël ènj. Insture kan tót 15 mei.

Weer wènse uch in eder geval väöl succes!

Geef een antwoord

Het e-mailadres wordt niet gepubliceerd.