Väörig jaor in deze tied höbbe w’r in samewèrking mit oetgaeverie Dialectboekjes ’t beukske “Floortje veert vastelaovendj” oetgebrach. Vanaaf ’t begin leep det wie ‘ne trein; ouch in de anger Veldekekringe die dit beukske in hun eige dialect hawwe oetgebrach. Noe ligke de nog resterendje exemplare op de versjillendje verkouppuntje nog te koup. Väör waem kènjer of kleinkènjer wiltj väörlaeze äöver de vastelaovendj en tegeliek get vertèlle äöver dit volksfieës.
De hoofdrol in dit beukske is väör Floortje. Det kèndj geitj väör ’t ieës de vastelaovendj mitmake mit alles waat daobie huuertj. ’t Verhaol geuf oetlèk bie alles waat zich väörduitj: ’t vastelaovespekske, ‘t sminke, de kluuere van de vastelaovendj, nónnevotte, de optoch mit kapel, Prins en wieze raod enz. Alles gecombineerdj mit leuke teikeninge. Floortje belaeftj ‘ne sjoane daag!
’t Verhaol is gesjreve door Astrid Frusch en väör de Echter oetgave hertaaldj door Piet Aben en Ton van Wegberg. De teikeninge zeen van Melanie Frissen. Vanaaf half januari te koup bie oos verkouppuntje – zoalang d’r väörraod is – väör € 17,50.
Väör de verkoup van recente Veldeke-oetgaves make w’r gebroek van ’n aantal verkouppuntje in versjillendje kerne van de gemèndje Ech-Zöstere.
In Ech zeen det: Museum van de vrouw, de Bieb, Bookhanjel/Poskentoar Bruna en derepark Hertespaor;
In Pej bie Fietsspecialist Wijnen aan de Houtstraot;
In Zöstere bie Primera aan ’t Wigibaldplein;
In Deetere bie cadeauwinkel “In ’t Plat”;
In De Nuujstjadt bie Wervin / Poskentoar.