Väör de eige leje, mer ouch väör anger belangstèllendje, wie o.a. van de zöstervereniginge Heemkunde “Echter Landj” en Natuurhistorische Vereniging “Pepijnsland” organiseertj Veldeke Krink Ech op 20 november a.s. ‘ne aovendj dae gans in ’t teike stuitj van de Echter lekkernieje. Waat wete w’r nog d’rvan? De echte Echter bekkerieprodukte wie de Echter vuurstein en de Echter krakelinge? Väöral die lèste waerdje tót ver äöver de waereld es delicatesse gezeen.
Jao, de meiste Echtenieëre höbbe dao waal èns van gehuuerdj en aojer minse höbbe soms nog get herinneringe. Mer ’t fiene wètj zelfs de bekker d’r neet van.
Väör deze Veldeke-aovendj haet ‘ne wèrkgroep óngerzeuk gedaon nao waat nog allemaol bekèndj en eventueel nog besjikbaar is aan fotomateriaal e.d. Die informasie kömtj op dees bie-einkóms väörbie in aafwisselendje blökskes. Ouch zeen de medaaljes aanwezig die de Echter Krakelinge op internationaal tentoanstèllinge höbbe behaoldj (foto). Good mäögelik det g’r nuuj dènger huuertj of det ’t anges zoot den g’r dachtj te wete. In eder geval höbbe w’r “inside-information” oet de bekkerie van Joosten oppe Plats en preuve w’r de vuurstein wie bekkerie Omloo oppe Baovestestraot die maakdje. ’t Zal dus ‘ne interessante nostalgische aovendj waere in de Pejjerhaof. Annie Schreuders-Derks geuf ’n inleiding äöver knapkook en slókgood. Daonao de informatie äöver de Echter Krakelinge in beeldj. Ouch de later glorie van “Echter Krakelingen” kömtj deze aovendj väörbie: ’t volleybalteam mit daezelfdje naam, de Echter Revue mit “’t Geheim van de Krakeling”. Leje van ’t revuekoar zeen aanwezig en zólle o.a. ’n paar leedjes oet die revue zènge. En gans recent van väörig jaor: de wisselpries bie ’t Echter Dictee, ’n krakeling op standaard. Nao de pauze is d’r ’n filmke äöver de Echter Vuurstein: ’t recep en wie ze gemaaktj waerdje.
Det allemaol op woonsdig 20 november, begin 20.00 oer in de Pejjerhaof, Houtstraat 7 in Pey-Echt.
