Echter kèrmis, ‘n femiliefieës

Noe Echter Kérmis weer väör de däör stuitj, haoje w’r op woonsdig 20 september ‘ne aovendj óm al get in de stömming te kòmme. Peter Roufs, al jaore lank lid van de kèrmiscommissie en sjriever van väöl stökskes in de Kèrmisgezèt van “’t Waekblaad” kömptj ós den persuuenlik get vertèlle äöver dit volksfieës. Óngertösse maaktj hae ‘ne kaetel kèrmissoep, zoadet g’r in de pauze ouch nog get te preuve höbtj.

Hae stuurdje ós es aankondiging vas ’n stökske proza van de handj van pestoar Ad Welters dae in 1920 in de “Geschiedenis van Echt” sjreef:

“De kérmisdaag in Ech zeen waal hieël bezunjer daag in ’t jaor. Den kump de ganse femilie weer saame in ’t oajerlik hoes, inne sjeem vannen Echter kèrktore. Hiej veultj m’n, dat wo m’n auch woontj, ’t nörges baeter is es thoes biej pap en mam.”…..en: “Hiej weurdj neemes oppe vingers gekeeke es kénjer en graote luuj anne taofel zitte en geniete van de oaj Limburgse Kérmisspecialiteite es: flaai, kréntewék en knapkook. Mer mam zal ze jus zégge: “Aetj mer good kénjer, doontj esof g’r thoes zeentj. ’t Is auch mer èns kérmis….!”

Nao de pauze zal Peter Roufs nog ein en anger vertèlle äover mechanische orgels en dit toelichte aan de handj van meziekfragmente.

Zoa ging det vreuger, mer auch noe haet ’t nog altied hiël get veut inne aerd väördet w’r de kèrmisdaag op ’n plezerige meneer same kènne doorbrènge. In de laezing op woonsdig 20 september óm 20.00 oer in de Pejjerhaof, Houtstraot 7 in Pej, zal hae uch dao nog mieë äöver kènne vertèlle. Leje van Veldeke, van de Heemkundevereniging en van de Natuurhistorische vereniging zeen oetgenuuedigdj väör deze aovendj. En anger belangstèllendje ouch welkom!

Geef een antwoord

Het e-mailadres wordt niet gepubliceerd.