Ouch de declamatiefinale in Zöstere is ’n succes gewore. Óm te beginne: allemaol 4e plaats, zag de väörzitter van de jury be ’t trökkieke op de prissentasies van dae mörge. Ouch dit jaor in Zöstere: finaliste van de twieë basissjoale oet eige dörp en van de sjoal verbónje aan ’t kènjercentrum in de Nuujsjtadt, totaal 28 deilnummers. De belangstèlling väör deze Veldeke-wedstried is nog stieëds groat.
De twieëdje finale van de Veldeke declamatiewedstried 2024 waas ouch ‘ne gezellige femiliemörge. De deilnummers wore mit aojers, breurkes en zösterkes, mit groataojers en ouch klasgenootjes en angere “aanhang” nao de Harmoniezaal gekómme óm de oetgekaoze gedichte väör te drage. In oos Limburgse taal, want dao geitj ’t óm.
De organisatie, de Wirkgroep Declamatie van Veldeke, goof in de inleiding door väörzitter Ruud Roumen aan blie te zeen det de basissjoale de declamatie in hun programma wille opnumme es ’n óngerdeil van taal en creativiteit, zoadet zoaväöl mäögelik kènjer mit kènne doon. En mit get hulp van lieërkrachte en (groat-)aojers kómme dao den de gooj rissultate oet, die w’r gezeen en gehuuerdj höbbe bie bie dees regiofinale. In de volle zaal woor de juste, mer ouch spannendje sfeer. Mer prissentator Robert Buckx wis de deilnummers mit ’n kort präötje op hun gemaak te stélle noe ze zich ginge maete mit kènjer van de anger basissjoale in “groat Zöstere”. De driekoppige jury haw es moeilike taak te bepaole waem ’t gekaoze gedich ’t bèste haw väörgedrage. Daobie tèltj op de ieëste plaats de meneer van väördrage: oetspraok, oetbeeldjing in gebare en mimiek. Kleijing en getuuendje attribute kónne dit óngersteune, mer zeen neet bepaolendj. Oeteindelik koom dao-oet de volgendje oetslaag:
Categorie groepe 1, 2, 3 en 4:
1. Emily van der Leek, BS In’t Park, Zöstere | Gedich: “Alfabet”
2. Wouter Jans, BS In’t Park, Zöstere | Gedich: “De keeper”
3. Ruben Golsteijn, BS De Springdonk, Zöstere | Gedich: “De keeper”
Categorie groepen 5 en 6:
1. Inez Ermans, BS De Springdonk, Zöstere | Gedich: “Miene pap” *
2. Sophie Rours, BS De Springdonk, Zöstere | Gedich: “Zösterse oet!eg” *
3. Saar Schoenmakers, BS De Springdonk, Zöstere | Gedich: “Zeivere en zeure”
en Sem Leinders, KC de Eik, de Nuujsjtadt | Gedich: “Mit Veldeke in ’t kelderke” *
Categorie groepen 7 en 8:
1. Fenna Bijsmans, BS In’t Park, Zöstere gedich: “Ich bön lekker stout”
2. Julia van Rossum, BS In’t Park, Zöstere | Gedich: “Mien eige taaltje” *
3. Lisa Verijdt, KC de Eik, de Nuujsjtadt | Gedich: “Bah, waat eine daag”
* zelf gemaaktj gedich
Opvallendj – ouch noe weer – ’t aantal zelf gemaakdje gedichte. Daobie zeen de sjrievendje aojers of groataojers zeker neet zunig mit ’t aantal regels. Ouch woor d’r ’n vrie groat aantal deilnummers die thoes neet altied dialect spraeke, ómdet ein van de aojers oet ’n anger streek kömtj.
Alle äöverige deilnummers dus ‘n dik verdeendje 4e plaats en ‘n oorkonde. Naodet de rissultate bekèndj wore gemaaktj, waerdje de prieze oetgereiktj door Veldeke veurzitter Jos Wackers, same mit José Peters names de wirkgroep Declamatie en de juryväörzitter Peter Feyen.
De kènjer die ‘n 1e of 2e plaats höbbe bereiktj, moge op zaoterdig 25 mei a.s. mitdoon aan de Limburgse finale in Gelaen.
Wènnieërs groep 1-2-3-4
Wènnieërs groep 5-6
Wènnieërs groep 7-8
Deilnummers groep 5-6
De jury aan ’t wirk
Belangstèlling in Zöstere
