M’n kan zich aafvraoge: Woróm neumdje m’n Kölle vreuger ouch waal “‘t Heilige Kölle“? Waat is ‘t versjil tösse de Blawwe en Roaje Funken? Woróm höbbe ze in Kölle ’n z.g. “Dreigestirn” en weurtj dao-in de “Jungfrau” door ’n man gespeeldj? En wie weurtj dae groate optocht op “Rosenmontag” georganiseerdj?
Dit en nog mieë zal Peter Roufs oet de deuk doon bie zien prissentatie äöver de Kölner vastelaovendj op de Veldeke aovondj op 25 januari a.s. óm 20.00 oer in de Pejjerhaof. Vas en zeker ’n good opstepke väör de kómmendje vastelaovestied. Väöl minse volge, naeve de plaatselike en Limburgse aktiviteite, op tv ouch de vieringe van de vastelaovendj en de optochte bie oos Duitse bure. Dao liktj volges väöle de oorsprónk van ’t karnaval. Vanoet Ech waere ouch väöl van die altiviteite bezóchtj. Bie zo’n gelaegenheid is Peter Roufs ’n paar jaor geleje oetgerope tót “Luitenant van de Blaue Funken”. Dit en anger ervarige wiltj hae op 25 januari gaer mit de bezeukers deile.
Dus wiltj g’r vas in de stömming kómme of zoamer get mieë wille wete van de Kölner vastelaovendj, böntj den d’rbie op woonsdig 25 januari. Leje van Veldeke höbbe gratis toegank, neet-leje zeen zeker ouch welkóm taege betaling van 3 euro entree.
