De aafgeloupe jaore, van 2015 – 2019 haet Veldeke Krtink Ech eder jaor ’n poëziewanjeling op ’t programma gehadj in ’n sjoan ómgaeving bönne ’t wèrkgebied van de krink. Die activiteit woor vanaaf de ieëste kieër ’n succes. Öm dao op trök te kieke, gaeve w’r noe ’n beukske oet mit ’n besjrieving van de wanjelinge: Lilbosch, Zöstere, Staeveswaert, Ech-centrum en de Nuujsjtadt. Mit foto’s en mit gedichte.
De sjrievers wore meis leje van de Sjrieverskring Midde-Limburg, womit VKE al eerder bie activiteite haw samegewèrktj. En noe dus 5 jaor achterein väör de poëziewanjelinge. Det haet väöl nuuj gedichte of verhaole opgeleverdj. In ’t book van de 5 jaor poëziewanjelinge zeen die aafgedröktj naeve of taege de achtergróndj van sjoan foto’s die van de wanjelinge zeen gemaaktj. Daomit is ’t book ’n herkènbaar bezit, hieël fejn óm te höbbe, in te kieke en in te laeze. Eventueel aan de handj d’rvan de wanjelinge (nog) èns te make. Mer ’t is ouch hieël gesjiktj óm cadeau te gaeve aan emes dae mit de streek of de betreffendje kerne get haet.
Aanvankelik zoe ’t book in mei zeen versjene. De óntwikkelinge mit ’t coronavirus en de daomit samehangendje maotregele höbbe de prissentatie d’rvan vertraogdj. Die kan ouch neet es activiteit väör alle leje plaatsvènje. Kómmendje zaoterdig, 26 september óm 16.00 oer zólle in ’t Cultuurhoes aan de Plats de ieëste exemplare aangebaoje waere aan mw. Marian Bruijsten, wèthaojer Cultuur van Ech-Zöstere en aan de fotograaf en sjrievers. Leje van Veldeke die bie de väörinsjrieving ’n book bestèldj höbbe, kènne det aafhaole vanaaf 17.00 oer, in ’t café van ‘t Cultuurhoes.
Vanaaf noe zeen de beukskes te koup in Ech (Bruna Echt, Leeswinkel / VVV, Museum van de Vrouw), Pej (Profile Wijnen), Zöstere (Marij Lemmens Drankenhandel), Staeveswaert (Museum / VVV) en De Nuujsjtadt (Wervin Wijnhandel) väör de pries van 12,50 euro.
