“Awd Pej in beeldj” bie Veldeke

Ónger de titel “Awd Pej in beeldj” organiseertj Veldeke Krink Ech op woonsdig 22 februari a.s. vanaaf 20.00 oer in de Pejjerhaof, Houtstraat 7, ‘ne aovendj mit foto- en filmbeeldje van get jaore geleje.

Väöl van oos leje, en die neet allein, beware herinneringe aan vreuger. Wie toen alles verleep. Zónger det op te hemele of d’r nao trök te verlange, is ’t döks sjoan óm dao foto’s van te zeen.

In de jaore 60-70-80 van de väörige ieëw woor in Pej ‘ne groep minse, aanhangers van filme (super 8) en van plaatselike historie, die van alles höbbe vasgelag. Bie dae groep woor ónger angere Boep Peters. De opnames zeen in dae tied versjillendje kieëre vertuuendj in ’t Patronaat in Pej ónger de titel “Pejjer luuj en landj”.

Boep en zien vrouw Nes (“van de Spar”) wore troew lid van Veldeke Krink Ech. Daoróm zeen w’r blie det w’r noe es ieëste in de gelaegenheid gestèldj waere get van die opnames via DVD, dus zónger det trille van die super8-beeldje, aan uch te laote zeen. De getuuendje gebäörtenisse van Pej zólle interessant zeen, mer ouch ’t tiedsbeeldj waat d’r door weurtj aangegaeve.

Muzikaal weurtj dit alles aangevöldj mit meziek van de groep “Tössedoor”. W’r doon det op ‘ne speciale aovendj in ’t kader van oos 40-jaorig jubileum. Dit stuitj dus nog neet in oos jaorprogramma!

Deze aovendj weurtj gehaoje op 22 februari in de Pejjerhaof, vanaaf 20.00 oer.

Geef een antwoord

Het e-mailadres wordt niet gepubliceerd.