Det is de titel van ’n project wo-in VKE op initiatief van de Menswel Cultuurcoach bezig is gewaes óm jóngere aan ’t sjrieve te kriege. ’t Rissultaat daovan is aafgeloupe zaoterdig, 2 juli, geprissenteerdj in de Laeswinkel/Bibliotheek in Ech.
Oeteindelik 5 jóngere, ènj basisjoal, höbbe ónger begeleiding van Kevin Damen ’n aantal wirkbieëinkómste gehadj, die gerichtj wore op ’t sjrieve van ’n eige verhaol. De bedoeling woor die verhaole (ouch) in ’t Limburgs te sjrieve, mer det bleek toch net ’n stepke te ver. Dao haet Veldeke dus bie gehólpe en ’n aantal leje haetj de verhaole hertaaldj. De sjrievers zelf gaon dees verhaole waal in ‘t plat väörlaeze.
Veer verhaole zeen oetgebrach in ’n beukske mit dae titel “Avonturen in Inkt”, det vanaaf noe in de Laeswinkel/Bibliotheek gratis te kriege is, zoalang es väörraod is. Daonao is ’t nog te lieën. Ouch kan m’n de verhaole huuere op ’t sjerm in de bieb en hie op de VKE-website mitlaeze ónger de knóp “Avonturen in Inkt”.
Veldeke haoptj zoa mieë jóngere tót sjrieve te bewaege en es det efkes kan natuurlik in hun eige taal. Informatie äöver dit project bie de bestuursleje Magna Bedaf en Ruud Roumen en bie Rick Vechel van Menswel.
