De jaorvergadering van Veldeke Krink Ech weurtj dees kieër gehaoje in de Fanfarezaal achter de Pejjerhaof op woonsdig 13 februari 2019 om 20.00 oer. De ingank is vanaaf de parkeerplaats via ’t paad langs de Lidl. Dit is zoa, ómdat oze vertroewdje zaal momenteel get verboewdj weurtj. Veldeke is de fanfaar dankbaar väör dees gebaoje mäögelikheid. Geer waertj ouch noe hèrtelik ontvange mit koffie en vlaai.
In dees jaorlikse algemein vergadering kieke w’r trök, op ’t verenigingsjaor 2018 mit väöl aktiviteite. Ouch noe weer verzörgtj Geert Janssen in de pauze de foto-presentatie daovan. Väör de pauze höbbe w’r de óngerdeile geplandj, die statutair verplichtj zeen. Daobie perbere w’r ’t väörlaeze en bespraeke van ’t jaorverslaag kórt en aanspraekendj te haoje. Det kan ouch, omdet de verslage van de aktiviteite al bie uch bekèndj zeen via oos Veldekebekèt.
De kascommissie brungtj verslaag oet van hun bevènjinge, bie ’t doornumme van de stökke, zoadet w’r ’t financieel verslaag kènne goodkäöre. Daonao kömtj de beneuming van ‘n nuuj lid väör dees commissie aan de orde. ’t Väörstèl van ’t bestuur is de contributie in 2019 neet te verhuuege.
Nao dees geldjzake de bestuurszake: volges ’t ruuester van aaftraeje zeen Yvonne Smeets en Rinus Mulders aan de bäört om aaf te traeje en die stèlle zich herkeesbaar. Miel Coenemans is neet herkiesbaar en w’r numme in dees vergadering aafsjeid van Miel es sikkertaris en bestuurslid van VKE. Leje van Veldeke kènne bestuurskandidate bekèndj make bie de sikkertaris t/m 10 februari 2019, of zichzelf opgaeve es kandidaat bestuurslid. Dao zoewe w’r erg blie mit zeen.
Nao de verkezing van nuuj bestuursleje is d’r tied väör de pauze mit de foto presentatie van Geert Janssen. Daona kieke w’r väöroet nao de inhoud van ’t nuuj jaorprogramma 2019, det geer achter op ’t Veldeke Bekèt als höbtj kènne bekieke. ‘n Vas óngerdeil van ’t programma van de jaorvergadering is de muzikale ómlijsting, dit jaor mit Paul van Loo.
