Zoa wie eerder beslaote en op de jaorvergadering in mieërt nog èns aangegaeve is, versjient deze maondj , ènj september 2026, ’t lèste Veld(j)eke Bekèt. Daomit weurtj nao 18 jaorgange en in totaal 72 nummers de oetgave van dit kwartaalblaad gestoptj. Van de eine kantj ómdet d’r gein opvolgers zeen väör de redactie óm dit blaad oet te gaeve, en van de angere kantj ómdet d’r vandaag de daag ouch anger mäögelikheje zeen óm de communicatie mit de leje vórm te gaeve.
In ’t vervolg kriege de leje ‘ne Nuutsbreef via de email. De bedoeling is det dit ‘ne sjonere en oetgebrèdje Nuutsbreef VKE zal zeen, den dae waat g’r tót noe toe ouch regelmaotig kreeg es d’r tössedoor get te melje woor. Aan de opzèt van deze Nuutsbreef weurtj noe volop gewirktj. De bedoeling is det half december de ieëste op eure email zal bönnekómme.
Weer wille hiebie ederein bedanke dae in de aafgeloupe jaore de oetgave van Veld(j)eke Bekèt haet mäögelik gemaaktj: de sponsors/adverteerders, de bezörgers, sjrievers van gedichte of stökskes teks en de fotografe. Väöl hievan zal ouch in de digitale Nuutsbreef ’n plaats kènne kriege.
En natuurlik ouch dank aan de leje/laezers, wovan de redactie in de afgeloupe jaore väöl waardering haef moge óntvange. ’t Lèste nummer van Veld(j)eke Bekèt is vanaaf noe in te zeen es g’r in de balk hiebaove “Nuuts” aankliktj en vervolges (lèste) Bekèt. Eerder nummers zeen te bekieke via “Rubrieke“, nao Veld(j)eke Bekèt en dao de rechter kolom: Archief.
