“t Twieëdje Echter Dictee zal plaatsvènje op zóndigmiddig 15 mieërt a.s. vanaaf 14.00 oer in de groate zaal van ’t Cultuurhoes aan de Plats in Ech. Väörig jaor woor “’t Smaalste stökske Nederlandj” ’t thema van de zinne van ’t dictee. Dit jaor zólle alle zinne de “Oorlog en Bevriejing” es thema höbbe.
Mitdoon aan dit dictee stuitj aope väör ederein: inwoners van Ech-Zöstere, mer ouch anger belangstèllendje oet de regio en dao boete. Te dènke aan awd-inwoners of minse oet de regio. Waal zal ’t Echter dialect es oetgangspuntj gelje: zinne waere in ’t Echs väörgelaeze en de jury hanteertj oos Brónsgreun Beukske, (editie Ech-Zöstere) es maotstaaf.
De titel “Echter Dictee” wiltj in eder geval neet aangaeve det allein Echtenieëre zoewe kènne insjrieve. Of waem allein Echs spruk. Ederein, kleine of groate leefhöbber van de Limburgse taal en van de spelling d’rvan kan mitdoon.
Ouch is ’t weer mäögelik óm op 2 menere mit te doon. “Officieel”, waat wiltj zègke det ’t dictee nao ’t sjrieve weurtj opgehaoldj en door ’n jury weurtj naogekeke. Dees deilnummers kómme in aanmerking väör ‘n 1e, 2e, 3e of 4e plaats. De oetslaag van de jury stuitj neet ter discussie.
Mer m’n kan ouch “zoamer’ mit doon: väör de joeks en den zelf aan de handj van de in de pauze geprojecteerdje gooj sjriefwieze ’t eige werk naokieke. Wieväöl foute huls se den väör dich zelf. ‘t Geitj bie ’t dictee zoawiezoa neet óm foute; waem wuntj haet ’t good gedaon! Det is de sport: zoa good mäögelik de Limburgse taal sjrieve.
Alle deilnummers, die zich höbbe aangemeldj, kriege nao aafloup ’n oorkonde. Degene mit de minste foute volges de jury, kan nao hoes gaon mit de Echter Krakeling-wisseltrofee en moog dem ’n jaor lank in bezit haoje. Bie inlevere krig hae of zie ’n blievendje herinnering, net wie de wènnieërs van de 2e en 3e plaats.
De organiserendje wirkgroep van Veldeke Krink Ech haoptj det ‘t ’ne gezellige wedstried zal waere ónger ’t motto: “Wae sjriftj, dae bliftj”. Aanmelje väör ’t Echter Dictee is nog mäögelijk tót 12 mieërt. Det kan mit behulp van de QR-code of de link hie ónger.
Aanmelje kan ouch mit behulp van deze link: Opgave 2e Echter Dictee!
En vergaetj neet: ’t Echter Dictee zal ouch gewuuen ’n gezellige Veldeke activiteit waere, wo ederein dae neet zelf mit duitj aevegood ‘ne sjoane middig zal kènne belaeve: kieke en genete van oos Limburgse taal!
