Vanaaf dit waekènj zal oppe website van Veldeke Krink Ech ‘t 50e verhaol in Limburgs plat kómme te staon. ‘ne Kleine mijlpaol!
Kort nao ’t begin van de coronamaotregele en ’t verplich bönne mótte blieve, is Veldeke mit dit “Project Loesterverhaole” begós. Vanaaf mei 2020 is daonao waekeliks ’n kort verhaol ingespraoke en op de website geplaatsj. Op ’n zelf te keze moment kan dao door ederein dae det wiltj nao geloesterdj waere. Det kan m’n individueel doon, mer ouch same. Sommige tehoezer of groepe van dagbesteding make dao gebroek van. De verhaole zeen den soms ouch aanleiding óm d’r same nog effe äöver door te praote.
Alle verhaole zeen aafkómstig van neet professionele sjrievers, die nao ‘ne oproop hun verhaol of hun verhaole besjikbaar höbbe gestèldj. Soms wore die verhaole in ’t Nederlands gesjreve, mer die zeen door de Veldeke bestuursleje Piet Aben en Ton van Wegberg hertaaldj in ’t Echs. Bienao alle verhaole zeen ingespraoke door Marjo Jaski-Verheesen, lid van Veldeke. De website van Veldeke Krink Ech is in de loup van dit project aangepasj mótte waere: intösse kan m’n vanaaf de äöpeningspagina via ‘ne speciale knóp “Loesterverhaole” rechstreeks bie ’t lèste verhaol, mer ouch bie alle al eerder geplaatsjde verhaole kómme. De verhaole zeen ingedeildj in categorieë: historisch, volksverhaole, natuur, belaevenisse enz. D’r staon ouch ’n paar langer gedichte bie.
En sinds pas kènne de vaste loesterieërs op die pagina eventueel ouch hun e-mailadres doorgaeve, wonao ze edere kieër mit ’n berichske d’r aan herinnerdj waere es weer ’n nuuj verhaol geplaatsj is. Det zal henjig zeen es strakkes neet mieë eder waek ’n nuuj verhaol weurtj ingespraoke. Alle aanpassinge aan de website zeen mäögelik gewore door ’n biedrage van de Rabobank Roermond-Echt es waardering väör dit corona-gerelateerdj initiatief van Veldeke Krink Ech.
Nuuj verhaole zeen äöverigens nog altied welkóm. Stuur ze aan info@veldekekrinkech.nl.
