Declamatiewedstried 2021 in anger vórm!

Dit jaor kan de declamatiewedstried väör de jeug van de basissjoale, zoa es w’r die van anger jaore gewèndj zeen, weer neet door gaon. Det is de twieëdje kieër op rie. Aan dit besloet ligke väör Veldeke Krink Ech versjillendje oorzake ten gróndjslaag: De provinciale wedstrijd geitj neet door. D’r zal dus gein Limburgse finale gehaoje waere. Daonaeve zeen de basissjoale pas kort aope en m’n haetj de henj vol óm ’t lesprogramma invölling te gaeve. De leerkrachte wille w’r neet ouch nog belaste mit boetesjoalse activiteite wie de declamatiewedstried. En de zale zeen nog neet besjikbaar väör (groate) bie-einkómste.

Alle raeje óm get anges te laote invalle! De werkgroep declamatie van Veldeke Krink Ech beejtj de volgendje mäögelikheid aan väör kènjer, die allein of same mit hun (groat-)aojers toch aan de slaag wille gaon.”

Maak zelf ’n gedichske, kort of langer. Wie sommige det ouch al deje väör de declamatiewedstried. ’n Eige gedich äöver ’n zelf gekaoze óngerwerp. Det kónne dere zeen, leefhöbberieë, (toekóms‑)druime of waat den ouch. Dao is gein opgave väöraaf. Waal zólle de gedichskes, net es bie de wedstried, ingedeildj waere in 3 categorieë: korte väör de groepe 3 en 4; get langer väör de groepe 5 en 6, en die väör de kènjer van groep 7 en 8 moge lank en ouch waat inhoud betruf get moeiliker zeen.

Draag dien gedichske väör en lik det vas. Det kan allein ’n geluidsopname zeen bv. ingespraoke via de telefoon en te versture es audio-app. Natuurlik is det mekkeliker es in ‘ne volle zaal en ze kènne ’t gedich d’rbie höbbe. Mer al mit al toch ’n spannendje opdrach, wo weer benuudj nao zeen.

De väördrach vas ligke kan ouch door middel van ’n filmke. Den kan m’n ouch aandach gaeve aan de attribute die de väördrach óngersteune. Ouch dit filmke kan den opgestuurdj waere. Nog spannendjer, mer väöl kènjer höbbe dao al ervaring mit.

Geluidsopnames en filmkes mótte gestuurdj waere aan: info@veldekekrinkech.nl, en waal uterlik 31 mei 2021. In ’t berichske mótte verder de naam (väör en achternaam), sjoal en groep, adres en telefoonnummer vermeldj waere. Oet de ingestuurdje opnames en filmkes zal de jury ’n keuze make. Veldeke zal de wènnendje väördrachte oppe website plaatse. De resultate mótte namelik, net wie bie de declamatiewedstried, aan angere getuuendj kènne waere. Det beteikentj det mitdoon, automatisch geitj inhaoje det d’r toestömming weurtj gegaeve óm ze te plaatse. Es in de zomer de coronaregels dit weer zoewe toelaote, bekieke w’r ouch of life-optraejes ’n vervolg kènne zeen.

De werkgroep declamatie wètj haos zeker det väöl kènjer hie zin in höbbe en det se dao get feins van kènne make en is hieël benuudj nao de inzendinge!

Reageren is niet mogelijk