Altied al oos plat get baeter wille kènne sjrieve, mer geine tied gehadj väör ‘ne cursus? Effe get mieë wille weite van wie se ’t plat mós sjrieve? Of de kènnis daovan weer èns get ophaole?
Väöraafgaondj aan ’t 2e Echter Dictee op 15 mieërt 2020, organiseertj de wèrkgroep Echter Dictee weer ‘ne “flitscursus spelling” op 17 januari 2020 in samewèrking mit cursusleider Piet Aben. Op deze cursusaovendj kómme alle regelkes van de Veldeke spelling väörbie. ’t Is geine complete cursus, mer toch genóg óm dich baeter te kènne behelpe. De flitscursus weurtj gegaeve in de Fanfarezaal achter de Pejjerhaof, en is toegespitsj op ’t Echs. Mer de algemein spellingsregels van Veldeke waere toegepasj, wodoor ouch anger dialectspraekers get d’r aan höbbe. Aan deze flitscursus kan ederein mit doon. Ouch waem neet van plan is aan ’t dictee te gaon deilnumme. En ouch waem neet lid is van Veldeke. De köste zeen 5 euro p’r deilnummer, inclusief ’n tas kóffie. Dit bedraag bie begin van de aovendj aan de zaal te betale. Waal is opgave väöraaf nuuedig i.v.m. de organisatie. Det kan door väör 10 januari ’t formulier in te völle op www.veldekekrinkech.nl. Mit smartfone kan m’n ouch de hiebij staondje QR-code scannen. Waem mit die media gein ervaring haet, kan ouch per email aanmelje: aa.jetten@gmail.com of t.slijpen@gmail.com. De fanfare-zaal is op 17 januari aope vanaaf 18.45 oer, ingank vanaaf de parkeerplaats, langs de Lidl.
Opgaaf Flitscursus 2020
https://forms.gle/hc4JaHhYrn1bvVsM7
