Mesjien koom ’t door de väöle aktiviteite, die dit waekènj in Ech en ómstreke plaatsvónje, mer de deilname aan ’t veerdje Echter Dictee woor minder es bie väörige edities. Mer det beteikendje neet det de waal deilnummendje leefhöbbers van sjrieve in de Limburgse taal zich neet höbbe ingespanne óm van dit evenemènt weer ‘ne spannendje middig te make. Mekkelik hawwe ze ’t zeker neet. Naodet VKE-väörzitter Jos Wackers de middig haw aafgetraptj mit ’n hertelik welkom aan ederein, prissenteerdje sjriefster Laura Theunissen ’t door häör op verzeuk van de wèrkgroep Echter Dictee samergestéldje dictee. Det haw ze de titel “De taal van ‘t hert” gegaeve: 13 zinne, neet al te moeilik waat betruf de Limburgse spelling, mer toch ouch neet zoa gemekkelik det ederein ’t d’r zónger väöl nao te dènke op pepier kós zètte. Bie ’t dictere van de zinne door Piet Aben – ieës in z’n gehieël en daonao in stökskes – woor ’t spannendj stil in de stadszaal van ’t Cultuurhoes.
Naodet de jury zich äöver de resultate haw gebaoge en oetgespraoke, kome de volgendje deilnummers es wènnieërs van ‘t 4e Echter Dictee op ’t podium:
Op plaats 3 Eddy Zeelen oet Linne; 2e plaats väör Annet Cremers van de Slek en op de 1e plaats Jos Cramers oet Holtum. Zie, mer ouch de anger deilnummers óntvinge ‘n oorkonde van deilname. De 2e en 3e plaats krege verder de daobie huuerendje glaze krakeling en de wènnieër van de 1e plaats de standaard “Waem sjriftj dae bliftj” óm ’n jaor lank thoes te höbbe staon en volgendj jaor in te levere väör de glaze krakeling 1e plaats.
Daonao waerdje nog väöl en lang mitein gespraoke äöver waat moeilik waas, wo m’n ’t neet mit èns woor, waat ’n bietje óndudelik woor, de dóm foute die m’n haw gemaaktj etc. Mer gelökkig väöral äöver wie fijn ’t woor óm mitgedaon te höbbe.
