’t Programma van de Veldeke-aovendj van 12 november haet ’t bestuur aangepasj en ómgezatj nao ’n wanjeling op zaoterdigmiddig 15 november óm 14.00 oer. De raeje is oetgelag in ’t lèste Veldeke Bekèt.
Óm toch in de sfeer te blieve van dees oetzunjerlike lokasie höbbe w’r in äöverlèk mit de stadsgidse d’rväör gekaoze ’n wanjeling te make door ’t centrum langs de panne-bördjes die g’r mesjien hie en dao al höbtj zeen staon. Op die meneer krig g’r ouch ein en anger te huuere äöver de gesjiedenis van de lokasie “Bie de Valk, noe Pannefabriek”. W’r keze dae middig väör de korte route; den kan m’n – bie belangstèlling – altied zelf nog de verder van het centrum gelaege plekke bezeuke.
De wanjeling begintj op zaoterdig 15 november óm 14.00 oer bie de roaj brök taegenäöver de ingank aan de Aosterbergerwaeg. De wanjeling doertj zoaget ’n oer en eindigtj weer op ’t terrein. In “Onder de Pannen” volgtj nog vervolginformatie ónger ’t genot van ’n lekker teske kóffie en ’n stök vlaai. Daoväör dene belangstèllendje bie ’t aanmelje ’n eige biedrage te betale van 5 euro p.p. väör leje en 7,50 väör eventuele deilnummendje neet-leje. Wie altied geltj ’t betale van dit bedraag es opgave. Betale kan via ’t raekeningnummer NL65 RABO 0138 6319 64 van VKE. Daobie estebleef naam, lidnummer en ’t aantal deilnummers vermelje. Aanmelje kan tót 10 november.
