Jaorliks haet VKE ‘ne aovendj met dialectväördrachte door sjrievers mit daobie passendje meziek. Deze aovendj weurtj dit jaor gehaoje op woonsdig 7 mei a.s. en – waat de väördrachte betruf – ingevöldj door Laura en Herman Theunissen – dochter en vader – van de Slek.
Laura is al bekèndj van de bundels mit korte gedichskes. Zie haet dao-oet ouch al eerder bie oos jaorvergadering get väörgedrage. De drang óm te sjrieve liktj väör pap Theunissen al get wujer weg: toen hae ein van de medewèrkers woor van de Lokale Radio Echt-Susteren (LOES). Per oetzending loos hae ‘n column väör äöver ’n actueel óngerwerp. Gebroekelik woor det hae det aafsloot mit ‘ne pakkendje oetsmieter. Mer det is toch alweer get jaore geleje.
- Laesj verder
Väörig jaor haetj Laura hem wete äöver te haole zien verhaole same te brènge in ‘ne bundel. Óntspannendj óm dao èns in te laeze. ‘ne Glimlach kömtj spontaan op dien gezich! Op oze “literaire aovendj” op 7 mei zólle zoawaal Laura es Herman väörlaeze oet hun werk: gedichskes en verhaole. Dit weurtj muzikaal aafgewisseldj mit meziek door de band BARD.
De bard woor de zenger van ‘ne kleine bevolkingsgroep, ‘ne zenger dae dapper bezungtj waat d’r gebäörtj, waat aan de handj is en waat good is óm te wete. Mesjien waal bekèndj oet Astrix en Obelix. De zenger weurtj op deze Veldeke-aovendj aangevöldj mit gitaar en trómmel.
Zoa bezungtj BARD in eige weurd en eige arrangemente, mit de begeleiding van zien muzikale kompane, ónger angere de teloorgang van de kirk, gereidsjap det ’t laeve mekkelik maaktj, drankgebroeke, mer ouch de beslómmeringe die de leefde soms mit zich mitbrungtj. Neet neerslachtig, mer mit ‘ne komische kwinksjlaag waere meujlike thema’s neet óntweke.
Nae, BARD is gein Jansebaggeband mer ouch gein Beppie. De sjtiel van BARD is meujlik in een hökske te plaatse; Poppie, mit muzikale invloede oet hun eige jeugdjaore, örges achterin de väörige ieëw.
BARD is Har van de Bekker (Timmermans) oppe basgitaar. Camiel Deelen op gitaar. Pieter Dekkers trommeltj. Deze hieëre óngersjteune oug Bart Driessen in zien gezang (óm te probere hem op ‘t rechte paad te haoje). Johan Gijsen, ouch gitarist van BARD, is d’r dit kieër neet biej. Hae geneetj van ’n welverdeendje vekansie.
Veldekes “literaire aovendj” is op woonsdig 7 mei óm 20.00 oer in de Pejjerhaof. Väör leje gratis toegankelik; belangstèllendje neet leje betale 3 euro entree.