Aafgeloupe februari koom ‘t väörlaeze in ‘t plat te vervalle in verbandj mit vastelaovendj. Kómmendje maondig 20 mieërt gaon w’r weer verder. Óm 16.00 oer zal den ’n vriewilligster van Veldeke Ech in de Laeswinkel/Bieb present zeen óm aan de kènjer ’n half uurke väör te laeze. Kènjer van 4 tót 7 jaor zeen van herte welkom óm te kómme loestere nao de verhaole van Boer Boris en anger avonturiers. Tót noe toe is d’r nog mer ’n klein aantal vaste toehuuerders. Die volge vol aandach alle verhaole en bekieke de sjoan plaetjes in de beuk. Soms höbbe de väörlaezers van Veldeke dao nog ’n kluuerplaat bie.
’t Väörlaeze op de 1e (Nederlands) en 3e (Limburgs) maondig in de Bieb gebäörtj in ’t kader van de ‘Boekenschatkist’, ’n projek laesbevordering en taalóntwikkeling. Want laeze is belangriek en väörlaeze aan jóng kènjer is de ieëste stap. De Bokesjatkis in de Laeswinkel/Bieb aan de Bovenste Straat 11 geitj op beide maondigge aope van 16.00 tót 16.30 oer. Aojers, of groataojers die mit kómme, kènne mit loestere, mer eventueel ouch intösse röstig zelf ’n book oetkeze. Kómme loestere is gratis.
