Het maondjeliks väörlaeze väör kènjer van 3-6 jaor in de Bieb aan de Bovenstestraat 11 in Ech liktj noe stop vanwaege zomervekansie. In september geit ‘t weer verder, wie gebroekelik op de 3e maondig van de maondj. Die periode kènne (groat-)aojers äöverbrögke door zelf aaf en toe väör te laeze, in Nederlands of in ’t plat. Allebei is good väör de taalóntwikkeling. Kènjer vènje ’t meistal fijn óm väörgelaeze te waere. In ’t aanbod van beukskes in de Limburgse taal is recent weer ’n nuuj oetgave versjene: “Floortje geitj mit de trein”. Leuk verhaol mit sjoan teikeninge en is noe nog verkriegbaar bie de verkouppuntje van Veldeke Krink Ech. En ze staeke d’r ouch nog get van op.
De verkouppuntje van Veldeke Krink Ech zeen:
Väör de verkoup van recente Veldeke-oetgaves make w’r gebroek van ’n aantal verkouppuntje in versjillendje kerne van de gemèndje Ech-Zöstere.
- In Echt zeen det: Museum van de vrouw, de Laeswinkel/Bieb en Bookhanjel/Poskentoar Bruna.
- In Pej bie Fietsspecialist Wijnen aan de Houtstraot.
- In Zöstere bie Primera aan het Wigibaldplein.
- In Deetere bie cadeauwinkel “In ’t Plat”
- In de Nuujstjadt bie Wervin/Poskentoar
Beukskes van Floortje in waal 10 Limburgse dialekte kènt g’r ouch vènje en bestèlle via “Dialectboekjes.nl”. G’r betaaltj den waal verzendkoste.
