De väörbereidinge van de jaorlikse declamatiewedstried van Veldeke zeen weer begós. Alle basissjoale höbbe ’t materiaal in hoes det nuuedig is om de kènjer en hun aojers/verzörgers te informere. Ouch ’t väörbeeldje-book mit gedichte, wo-oet de kènjer ’n gedich kènne keze.
Óm mit te kènne doon aan de wedstried dene ze zich zo’n gedich van boete te lieëre en good te declamere. Declamere is zoa good mäögelik väördrage mit zoa min mäögelik hulpstökke. Hun stöm, de toan, de wisselinge in tempo, de gebare en gezichsoetdrökkinge, die mótte ’t eigelik doon: good oetdrökke wo ’t gedich äöver geit. ’t Verhaol tót oetdrökking brènge, ’n döbbel laog langzaam-aan tót ontwikkeling laote kómme enz.
Kènjer moge ouch zelf ’n gedich sjrieve, of dit same doon mit aojers of groataojers. Es se det duis, stuitj zón gedich vanzelf kort bie dich. De zelfgemaakdje gedichte dene waat ómvang betruf waal aan te sloete bie de gedichte in ’t gedichtebook van Veldeke. Want de declamatiewedstried kèntj 3 categorieë, die same valle mit de groepe 3 en4, 5 en 6 of 7 en 8 van de basissjoal. Oefene en oetprobere kan op sjoal gebäöre, es daoväör gelaegenheid weurtj gegaeve, mer kan ouch thoes door de (groat-)aojers. Sommige sjoale, wo eder jaor väöl deilnummers zeen, haoje ‘ne eige declamatiewedstried. Det is ‘ne gezellige mörge of middig óm te bepaole welke kènjer väör hun sjaol nao de regiofinale gaon. Op de regiofinale kènne väör eder categorie en van eder sjoal of kern mer 2 of 3 kènjer mit doon.
’t Aanmelje väör de wedstried gebäörtj ouch meistal via de sjoale. Mit ’n opgaveformulier waere van die kènjer de gegaeves doorgegaeve aan de werkgroep declamatie van Veldeke Krink Ech. Oppe Nuujstadt numtj vanaaf dit jaor de Stichting Tiba dit op zich; kènjer kènne in ’t gemeinsjapshoes in ’t book hun gedich oetkeze. De datums van de regio-finales in Zöstere en Pej-Ech zeen respectievelik vriedigaovendj 13 en 20 april a.s., aanvang 19.00 oer. Veldeke wènsj alle kènjer vas ’n gooj väörbereiding en bie väörbaat väöl succes. Es d’r nog vraoge zeen, kan m’n belle mit de coördinator Piet Aben 0475-482146 of mit 0475-482149.
Winnieërs väörig jaor.
De kènjer die väörig jaor in de regio-finales in Pej en Zöstere ‘n 1e, 2e of 3e plaats höbbe gehaoldj, wille w’r nog aanbevaele mit te doon aan ’t z.g. “Open Podium” det op zóndigmiddig 18 mieërt a.s. vanaaf 14.00 oer gehaoje weurtj in ’t gemeinsjapshoes in Roostere. M’n deentj zich den waal väöraaf op te gaeve per email aan: ad.gijzels@gmail.com
