Aafgeloupe waek is in ’t Cultuurhoes de tentoanstèlling “Gruuets” geäöpendj. ’n Besjeije äöpening want de väöroetzichte wore en zeen neet good: bezeuk mit coronacheck en móndjkepke en mesjien zelfs ’n paar waeke weer hieëlemaol toe. Dao kan zelfs ’t enthousiasme van börgemeister Jos Hessels neet taege op es hae, mit ènkel get fotografe en 3 vertegenwoordigers van de deilnummendje vereniginge op aafstandj óm zich haer, oetspruk det dees tentoanstèlling van alles in zich hèltj wo de inwoners van Ech-Zöstere zeker gruuets op moge zeen.
De tentoanstèlling “Gruuets” is ’n initiatief van ’t Museum van de Vrouw óm same mit de anger vaste gebroekers van ’t Cultuurhoes aan de Plats in foto’s, tekste en väörwerpe te laote zeen waat in de versjillendje kerne van de oetgestrèkdje gemèndje de meujte waerd is óm gezeen te waere. Ouch door inwoners is nao ’n oproop in ’t Waekblaad ein en anger aangeleverdj.
Gelökkig is väör dees tentoanstèlling ‘ne rume tied genómme, zoadet ’t väöle werk neet vergaefs zoe zeen es ’t bezeuke d’rvan de kómmendje waeke neet kan. Haopelijk zal in ’t begin van 2022 weer ’n bezeuk gebrach kènne waere. Veldeke Krink Ech haetj – es ein van de participante – aan alle leje ’n gratis entreekaertje verstrektj, det geljig bliftj tót mei, es de tentoanstèlling aaflöptj.
