Väör de kènjer van de basissjoale organiseertj Veldeke Krink Ech dit jaor weer ‘ne declamatiewedstried, wobie dees jónges en maedjes ’n zelf gekaoze gedich kènne väördrage. Deze wedstried weurtj intösse in Ech väör de 23e en in Zöstere veur de 17 kieër gehaoje en zal ouch dit jaor weer aafgeslaote waere mit ’n Limburgse finale.
Mer ’t begintj thoes en op de sjoale. De Wèrkgroep Declamatie van VKE zal d’rväör zörge det nao de carnavalsvakantie alle sjoale in ’t bezit kómme van de materiale die nuuedig zeen óm dees activiteit te kènne oppakke. De meiste basissjoale höbbe de wedstried al in hun jaorprogramma opgenómme, wobie den geliekertied taalaspekte wie väördrach, oetspraok e.d. aandach kènne kriege. De door de wèrkgroep geselecteerdje gedichte zeen dit jaor, behalve in ’t gebroekelike book, ouch weer digitaal aan de sjoale besjikbaar gestèldj: 5 väörbeeldjgedichte väör de 3 versjillendje laeftiedscategorieje. Det zeen: groep 1,2,3 en4, groep 5 en 6 en groep 7 en 8, stieëds get moeiliker. Tót half mieërt kènne kènjer aangemeldj waere óm mit te doon. Meistal en leefs via ’n formeleer det ze op de eige sjoal kriege. Mer es det neet kan, is ’t ouch mäögelik dit later rechstreeks te doon bie Veldeke. Daonao waere, begin april, ’n paar regiofinales gehaoje, o.a. in Ech op Paosmaondig 6 april smiddigs en in Zöstere op 12 april smörges.
Verder informatie óm mit te gaon doon en ’n gedich oet te zeuke bie de coördinator cultuur van de eige sjoal, of äöver de declamatiewedstried algemein bie de coördinator van Veldeke Krink Ech, tel. 06 55 08 13 11.
