Het jaorprogramma 2026 woor al klaor en ’t Veldeke Bekèt al bie de drökker wie w’r berich krege van carnavalsvereniging “De Aester” det zie de vetroewdje Seniorenparade weer gaon aanbeje. Ze gaon hieväör weer trök nao de zaal van de Royal Service Bioscoop, mit zitplaatse.
Tót aan de coronaperiode woor Veldeke Krink Ech eder jaor ‘ne vaste bezeukersgroep: minse die allein neet nao zo’ne bóntje aovendj zoewe gaon, sjreve zich in en wiste dao minse te treffe die ze kèndje en in ‘ne plezerige mer neet al te oetbundige sfeer. Noe “De Aester” dit weer aanbeutj, wille weer dao gaer gebroek van make. W’r haope det de belangstèlling ouch bie uch zal zeen.
De Seniorenparade 2026 zal zeen op dónderdig 5 februari, begintj óm 19.00 oer en zal tót óngevieër 22.33 oer doere. En väör o.a. Veldeke geldtj ‘ne speciale pries! Het programma bestuitj oet de vertroewdje mix van gooj en bekèndje artieste wie: de Jónges van de Zank, ‘N Dance, Meister Martijn, Thei en Marij en ‘n buut van Har Daniëls. En daobie natuurlik Prins Rob I, Jeugdprins Max I en Jeugdprinses Jade mit hunne aanhank. Al mit al genóg óm ‘ne sjoane aovendj van te make.
Wiltj g’r aan dees activiteit deilnumme den kan dit op de bekèndje meneer: ’t bedraag van 8 euro p.p. äörvermake op ’t nummer van de penningmeister VKE: NL65 RABO 0138 6319 64 mit vermelje van naam, lidnummer of adres en ’t aantal kaarte. G’r krig gein berich trök, behalve es ’t oetverkoch zoe zeen. Es g’r betaaldj höbtj, meltj g’r uch op de aovendj zelf in de foyer van Royal bie ein van de bestuursleje van VKE. Kómtj oppertied, want d’r kènne gein plaatse waere vrie gehaoje! De zaal is aope vanaaf 18.30 oer.
