Awd Echtenieër Sef Vergoossen, gebäörtig van ’t Hinge mer noe wonendj in Aalbaek, kömtj op 26 mieërt a.s. nao ’t Cultuurhoes in Ech óm ’t Echter Dictee väör de deilnummers te prissentere. Óndanks det zien voetbal- en trainerscarrière zich ruum boete Ech haet óntwikkeldj en aafgespeeldj is Sef altied zien gebaortedörp troew gebleve en zuutj m’n h’m dao nog geregeldj. Hae is ouch zien Echter plat blieve spraeke en vuntj det belangriek. Raeje woróm hae ouch drek mit wildje doon wie de Wirkgroep Echter Dictee hem benaderdje óm op dae zóndigmiddig de aaftrap te doon.
Op zóndigmiddig 26-03 stuitj bie Veldeke Krink Ech, nao twieë jaor vanwege corona geëxperimenteerdj te höbbe mit digitale versies, weer ‘n zaal-versie van ‘t Echter Dictee op het programma. Sef Vergoossen zal bie de aanvang de dicteezinne väörlaeze. Die gaon deze kieër äöver sages en legendes in ‘t landj van Ech. Es awd inwoner zólle dees verhaole hem neet ónbekèndj zeen. Hae zal de zinnen ieës väörlaeze, wonao dees väör de deilnummers nog conform ’t reglemént zólle waere gedicteerdj. ’t Twieëdje Echter Dictee weurtj gehaoje in ’t Cultuurhoes Edith Stein aan de Plats in Ech en begintj óm 13.30 oer. De zaal is aope vanaaf 13.00 oer. Dees activiteit is toegankelik väör ederein. Ouch mitdoon stuitj aope väör ederein, mer daoväör deentj m’n zich i.v.m. de organisatie van de wedstried väöraaf aan te melje. De kan gemekkelik mit de link dae ónger dit artikel stuitj.
Det mitdoon kan op twieë menere: deilnumme mit jurering. ’t Dictee weurtj den nao ’t sjrieve opgehaoldj en door de jury naogekeke. ’t Besloet van de jurering en ’t aantal behaoldje puntje óntvungtj ederein persuuenlik trök. ’t Resultaat weurtj neet bekèndj gemaaktj, tenzij se det zelf duis. De deilnummers mit de minste foute waere waal geneumdj, want die kómme in aanmerking väör ‘n 1e, 2e, of 3e plaats bie de priestoekènning. De oetslaag van de jury stuitj neet ter discussie. Mitdoon mit jurering is speciaal bedoeldj väör diegene die al dökker in ’t Limburgs sjrieve, get regels kènne en zich sportief wille maete mit anger deilnummers. Neet mieë, neet minder!
M’n kan ouch d’rväör keze óm zónger jurering mit te doon. In det geval kan ederein ’t dictee make en zelf zien of häör dictee naokieke aan de handj van de ónger de pauze geprojecteerdje gooj sjriefwieze. Dees mäögelikheid is speciaal väör waem ’t èns zoe wille probere in good plat te sjrieve, mer väör waem d’n oetslaag neet belangriek is. Mesjien vèltj ’t mit en geis se ‘ne volgendje kieër ouch väör jurering mitdoon. En vèltj ’t taege, den höbs se d’r in eder geval get van gelieërdj.
Want dao geitj ’t óm: op ’n sportieve en eventueel competatieve meneer kieke wie ’t stuitj mit ’t sjrieve van oos eige taal. Alle deilnummers, die zich väöraaf höbbe aangemeldj, kriege nao aafloup ’n oorkonde. Aan deilname zeen gein koste verbónje. Op dees meneer stuitj waal edere deilnummer geregistreerdj mit de juste naam; dit in verbandj mit die oorkonde. Het dictee weurtj gedicteerdj door Piet Aben.
Degene mit de minste foute volges de jury, kan nao hoes gaon mit de Echter Krakeling-wisseltrofee en moog dem ’n jaor lank in bezit haoje. Ouch de priesoetreiking zal gebäöre door Sef Vergoossen.
