Gister is de ieëste tegel ónthuldj in ’t kader van “Oos plat liktj noe ouch in Pej oppe straot”. Det gebäördje in ’n duo-activiteit, die Veldeke Krink Ech haw georganiseerdj same mit de Klankbordgroep Pey en mit mitwèrking van de gemèndje Ech-Zöstere. De teks van de tegel zeen de ieëste veer regels van ’n Averegs-leedje: “Tösse ‘t greun van ’t graas en ’t goudgaele kaore, dao liktj ’t Hènge dao bön ich gebaore”. Tekssjriever Henk Hover haw dit leedje destieds gemaaktj väör zien moder en laote de aojers Hover noe gister net 60 jaor getroudj zeen. ’n Good moment óm dae tegel te ónthulle. Det gebäördje ter plekke – de ingank van de speeltuin op ’t Hénge – mit ’n gezamelike actie van de börgemeister en mw. Hover. Min toesjouwers op det moment, ómdet de regels gevolgdj móste waere. Mer Veldeke haw de genuuedigdje tegeliekertied verzameldj op ’t terras van cafe “’t Hingen” väör ’n drenkske en get toelichtende toespraoke. Deze tegel is ’t begin van ’n project “Oos plat liktj noe ouch in Pej oppe straot”, det in de kómmendje maondje en jaore zal waere gerealiseerdj.
