Dictee van juni

’t Digitale Echter Dictee van de maondj juni geitj verder mit ’n zèstal spreuke. Dit nuuj dictee stuitj vanaaf noe oppe website van Veldeke Krink Ech. ’t Is good weer thoes op de computer te make in óngevieër ’n kerteer.

De wirkgroep van Veldeke wiltj mit de maondjelikse digitale dictees ’n alternatief beje väör ‘t dictee in ’t Kultuurhoes, waat noe – mit väöl minse – nog neet mäögelik is. En ederein dae wiltj kan de oefening noe thoes make, zónger al te groate spanning. Daoväör geit m’n nao de website: www.veldekekrinkech.nl. In de balk baovelangs de knóp “dictees” keze en m’n is rechstreeks op de gooj pagina. Hier staon alle tót noe gepubliceerdje dictees; ’t lèste en nuutste stuitj baovenaan, mer leefhöbbers kónne ’n eerder dictee eventueel ouch nog make.

Nao keze en aanklikke kömtj m’n in ‘t dictee-formulier. Hie mót ieës ingegaeve waere in welk van de 3 dialekte (van Ech, Zöstere of de Boesj) g’r ’t dictee wiltj sjrieve. En verder of se es deilnummer in de scorelies mit de anger deilnummers wils waere opgenómme mit naam en/of emailadres.

Verder wèrktj ’t digitaal dictee net es ’t live-dictee: de zinne waere regel väör regel väörgelaeze. De deilnummer typtj d’r ónger wie hae of zie dènktj det ’t gesjreve zoe mótte zeen. Door op ’n pielke te drökke kan m’n de väörgelaeze teks versjillendje kieëre opnuuj beloestere. D’r is dus genóg tied.

Wae det wiltj, kan zien dictee aan ’t ènj insture en laote naokieke. Det gebäörtj den automatisch. Väör spelling gebroektj ‘t programmaj de spelling van Veldeke, zoa es die te vènje is in ’t Brónsgreun Beukske, editie Echt-Susteren en in de Zösterse Kal. Op ’t opgegaeve emailadres krig m’n nao ’n paar daag ’t persuuenlike contróleblaad gestuurdj. En twieë kieër p’r maondj de totaalstandj.

Ónger aan ’t dictee is de mäögelikheid óm opmerkinge te make. Aan de handj van die opmerkinge kan de wirkgroep aanpassinge in de dictees aanbrènge. Zoa zeen de recente dictees korter en zeen de zinne ouch minder lank. In de automatische beoordeiling zeen bepaoldje aanpassinge gemaaktj. Mer neet alles kan bönne ’t programma! Belangriek is good te loestere en te sjrieve waat väörgelaeze weurtj. Ouch de puntje en laesteikes.

Weer wènse uch väöral plezeer mit ’t nuuj dictee en väöl succes. Klik op de de teks ónger de foto óm nao ’t dictee te gaon.

Juni 2021: Echter Dictee mit spreuke!

 

Reageren is niet mogelijk