Bie de prissentatie van ’t beukske “Floortje veert vastelaovendj” op 12 februari in de Bieb wore de jeugdprinse en – prinsesse van CV de Aester Ech, van CV de Foetelaers oet de Nuujsjtadt, van CV Wintjerköningske van de Deelgaard en van de Sprènkhane van ’t Hènge aanwezig, sommige mit adjudante of begeleidendj gevolg. De ieëreväörzitter van Veldeke hoot ze allemaol welkom en vertèldje kort get äöver ’t beukske. Ouch de wèthaojer Inge Minkenberg en de sjriefster Astrid Frusch en anger belangstèllendje, die al of neet toevallig in de bibliotheek wore, waerdje welkom geheite. Prins Bert van de Aester woor d’r es begeleider van ziene zoon, jeugdprins Sem. Hae zoe ’n stökske oet ’t beukske helop väörlaeze, mer koom neet oetgelaeze. Hae loos aan ein stök door en nog waal zónger gater, wie in d’n optoch, huuerdje w’r emes zègke.
