Limburgse Hook in de BieB 

Op dónderdigmiddig 19 november óm 14.30 oer weurtj in de BieB aan de Bovenstestraat 9 ‘ne zoageneumdje “Limburgse Hook” in gebroek genómme. Net op dae daag is de BieB op die lokasie ein jaor in gebroek. Vanaaf ’t begin en ouch in de aoje biblioteek haet Veldeke Krink Ech meujte gedaon óm ’t Limburgs es taal dao ’n plaats te gaeve; in gespraoke én in gesjreve vórm.

Bekèndj zal zeen ‘t maondjelikse väörlaeze väör jóng kènjer van zoaget 3 tót 7 jaor: edere dördje maondig door vriewilligers van Veldeke. Gemiddeldj is dao den ’n gruupke van 5 tót 9 kènjer aanwezig. Die kómme den mit aojers of groataojers of oppas ’n half uurke loestere nao ein in oos Limburgs väörgelaeze verhaol.

Bie de äöpening van de nuje BieB in november 2025 haet VKE ’n bedraag besjikbaar gestèldj óm ’t Limburgs in de BieB ’n plek te gaeve. Det bedraag woor aafkómstig van de börgemeister, gekrege bie zien aafsjeid van ’n organisatie wo hae in ’t bestuur zoot. Hae goof aan det Veldeke daoväör ’n gooj bestömming kós keze. Det is gebäördj: väör det geldj woor al bie de äöpening ’n taofel geplaatsj en ‘ne plattegróndj op de moer mit de aafbeelding van de gemèndje en ’n sjoan gedich. Ouch elders in de BieB zeen Limburgse tekste versjene, gesjreve door de sjriefster Laura Theunissen van de Slek, det de BieB ouch regelmaotig benutj väör bookprissenaties.

Mer de planne óm ’t Limburgs in de BieB ’n plaats te gaeve, ginge verder. En dit haef gelèdj tót de noe te äöpene “Limburgse Hook”, wo-in ouch ‘ne bokekas ’n plaats haef gekrege wo de bezeukers Limburgstalige beuk en beuk äöver Limburg zólle aantreffe die door VKE dao geplaatsj zeen oet ’t eige bookbezit, awd en recent. De meiste beuk kènne ingekeke, mer ouch gelieëndj waere. Op die meneer perbere VKE en de BieB ’t laeze van ’t Limburgs te bevordere. Det vènje de meiste minse neet gemekkelik, mer ’t bliektj det get oefene kan helpe. Die kans is d’r noe! De Limburgse Hook is ’n sjoan aanvölling van de versjillendje functies die de BieB vandaag de daag haetj. In de kómmendje tied zölle ouch de kursusse “Leef Limburgs” en “Laeze en sjrieve” in de BieB gegaeve waere.

W’r zólle ‘t op pries stèlle es g’r bie bezeuk aan de BieB dao regelmaotig èns gaontj kieke.

Reageren is niet mogelijk