De Limburgse finale van de Veldeke declamatiewedstried zal dit jaor gehaoje waere in MFC “het Patronaat” in Sint Joas op zaoterdagmiddag 24 mei a.s. vanaaf 13.30 oer. Det beteikentj väör de finaliste van VKE bienao ‘ne thoeswedstried.
Naeve de 11 kènjer oet Ech en Zöstere zólle nog 12 deilnummers oet anger Veldekekringe mitdoon. Al dees kènjer zeen bie de eerder gehaoje väörrundjes geselecteerdj väör deilname aan dees Limburgse finale. ’n Speciaal samegestèldje jury zal den bekieke waem daobie ’t bès nao väöre kömtj en waem zich ’t kómmendje jaor “Limburgs Kampioen” moge neume.
’t Woor dit jaor get zeuke nao ‘ne gesjikdje zaal en oeteindelik koom daobie de zaal in Sint Joas in beeldj: centraal gelaege in de provincie, waat väör de deilnummers belangriek is. Väör minse oet de ómgaeving is bekèndj det ’t Patronaat ‘ne sjoane, groate zaal is mit de juste faciliteite. De Wirkgroep Declamatie van Veldeke Krink Ech zal de organiserendje Limburgse wirkgroep bie de väörbereidinge óngersteune. Prissentatie en jurering zeen, wie väörgaondje jaore, väör raekening van Veldeke Limburg, det ouch de deilnummendje finaliste en hun begeleiders zal verwelkómme. De declamatiewedstried is verder te bezeuke door ederein.
Ouch oet Venlo, Tegele en Wieërt zólle deinummers kómme óm hun gedich te declamere. Daobie zeen – net wie bie de väörrundjes – dees kènjer ingedeildj in 3 categorieë: de groepe 1 tót en mit 4 van de basissjoal, de groepe 5 en 6 en es besloet de groepe 7 en 8. De te declamere gedichte zeen daobie aangepasj, zoawaal waat de lèngdje betruftj es de inhawd. De finale-deilnummers höbbe hun gedich dus al versjillendje kieëre väörgedrage en nóg dökker geoefendj. Want det is belangriek en bliektj ouch stieëds baeter te gaon.
Veldeke Limburg organiseertj al mieë es 20 jaore de declamatiewedstried óm de Limburgse taal ouch bie de jeug ónger de aandach te brènge en op die meneer te bereike det die neet verdwientj. En de wedstried bliektj dus good aan te slaon, want eder jaor doon weer väöl kènjer mit! Per categorie waere door Veldeke 5 gedichte aangebaoje, wo-oet de kènjer d’r ein kènne keze es zie wille mitdoon aan de wedstried. Sommige deilnummers inspireertj ’t ouch óm zelf ’n gedich te gaon sjrieve, of same mit aojers of groataojers ’n eige gedich te make óm väör te drage. Veldeke wènsj al die entoesiastelinge väöl succes en väöral väöl plezeer!