Kós ‘t baeter? ’t Woor te verwachte det in oos 40-jaorig jubileumjaor ’t leje-aantal op 250 zoe kómme. Nog oppe jaorvergadering in februari haet de väörzitter alle leje opgerope väöral van móndj tót móndj reklaam te make väör lidmaatsjap van oze krink. Eder lid dit jaor ’n nuuj lid, det woor ziene wèns. Det moog trouwes altied nog, ’n sjoner jubileumcadeau is neet dènkbaar.
Mer al in mieërt kós – nao de cursus Laeze en Sjrieve, wo altied ’n aantal leje oet volge – det 250ste lid waere ingesjreve. Oppe leje-aovendj van 22 mieërt maakdje de väörzitter bekèndj det Rabecca Wanders oet Ohé en Laak es 250ste lid van Veldeke Krink Ech woor ingesjreve. Aan ’t begin van dae aovendj kreeg zie daoróm ’n Brónsgreun Beukske aangebaoje. Rabecca volgdje es Braobantse d’n 10e cursus Laeze en Sjrieve in Limburgs Dialek en haw d’r volges eige zègke väöl plezeer aan belaefdj.
W’r zeen es bestuur blie mit dit aantal leje en haope det de leje zelf det ouch zeen. ’n Sterke vereniging kan de aandach väör oos Limburgse taal en cultuur ouch sterker oetdrage.
