Bestuursleje van Veldeke Limburg en van de 10 veldekekringe in Nederlands en Belsj Limburg zeen oetgenuuedigdj väör de jaorlikse kringekontakdaag dae dit jaor door de Krink Ech weurtj georganiseerdj en op 13 september weurtj gehaoje. Het programma is – wie gebroekelik – opgezatj óm de bestuursleje oet de anger kringe kènnis of baeter kènnis te laote make mit ’t gebied in Limburg wo de gastkrink ziene thoesbasis haetj. VKE presenteertj dees kieër de recente óntwikkelinge in “ ’t Smaalste Stökske”.
Väörig jaor kreeg väörzitter Jos Wackers in Steyl – wo de Krink Venlo de daag haw georganiseerdj – de vlag doorgegaeve door de väörzitter van Veldeke Limburg óm aan te gaeve det dit jaor de Krink Ech weer aan de bäört is óm dit te organisere.
’t Programma van dae daag is es volgtj: Óntvangst in de Stadszaal, bezeuk aan ’t Wonderkabinet in ’t museum, wanjeling langs de tegelroute mit dialectspreuke, en bezeuk aan ’t gebied “de Pannenfabriek”. Aafsloetendj ’n buffèt, omliesj door ’n optraeje van de ambassadeurs van Ech-Zöstere: Spik en Span.
De kringe* van Veldeke zeen:
In Nederlands Limburg:
Krink Venroy
Krink Venlo
Krink Wieërt
Krink Remunj
Krink Ech
Krink Zitterd
Krink Haerle
Krink Um Mamelis
Krink Mestreech
Väör Belsj Limburg:
Veldeke Belsj, mit aafdeilinge in
Kinrooi, As, Hasselt
Kringe van Veldeke zeen zelfstandige organisaties, vereninginge of stichtinge mit ’n eige bestuur en organisatie, die aangeslaote zeen bie Veldeke Limburg det ’n Limburgs bestuur kèntj. De aanduiding “krink” geuf aan det ‘t ’n groater gebied betruf róndjóm de in de naam aangegaeve plaats.
Twieë kieër in ’t jaor vergadertj ’t Limburgs bestuur same mit aafgevaardigdje oet de kringe.
