Emile Roemer de commissaris van de Käöning in oos provincie, wiltj bönnekort ouch Limburgs kènne spraeke. Mit interesse is hae kortgeleje ingegange op de oetnuuediging van de samestèllers van de lesmethode “Leef Limburgs” óm mit dees methode te kómme kènnismake. ’t Rissultaat is det hae noe zelf kursist is en mit väöl enthoesiasme al ’n aantal lesse haetj gevolgdj. Zien motivatie is dudelik: ’t dageliks kontak mit de Limburgers zal nog baeter verloupe es hae hun taal neet allein kan verstaon, mer ouch kan spraeke.
De lesmethode LT2 (Limburgs als tweede taal) is provinciebreid óntwikkeldj óm zoagenaamdje “nieuwkomers”, beväörbeeldj minse van boete de provincie die in Limburg werk höbbe gevónje, mer ouch Limburgers die in ’t Nederlands zeen opgevoedj, de mäögelikheid te gaeve, ’t Limburgs te lieëre spraeke. Det projekt is in opdrach van de Raod veur ’t Limburgs, (teves hoofdsponsor) óntwikkeldj. ’n Paar jaor lank höbbe professionals de lesmethode väörbereidj en väörig jaor september is in Ech de ieëste kursus gestartj. Momenteel löptj dao al ‘ne twieëdje kursusgroep, wovan de deilnummers de variant “’t Smaalste Stökske” volge. In anger regio’s van de provincie zeen ze ouch al mit ’ne kursus begós of zulle ze det bönnekort gaon doon. Roemer volgtj deze variant, mer vanwaege zien werk volgtj hae de lesse individueel en neet in ‘ne groep. De docente Marjo Jaski-Verheesen en Marlène Scheres-Verheesen, allebei ouch lid van de Veldeke Krink Ech, gaeve aan det hae erg gemotiveerdj en geïnteresseerdj is en de lesse hieël serieus numtj. Ofsjoan hae zich noe al good kan behelpe in ’t Limburgs, is zien doel óm in alle situaties de Limburgse taal good te kènne gebroeke. ’n Kwestie van gedöldj…
