De jeugvastelaovesvereniginge in Ech-Zöstere zeen door Veldeke oetgenuuedigdj väör de prissentatie van ’t beukske “Floortje veertj vastelaovendj”, ’n nuuj (väör-)laesbeukske väör kènjer, wo-in allerlei óngerwerpe betreffendje de vastelaovendj v’rbie kómme, ómdet Floortje d’rnao vreug. En in de antjwaorde die Floortje krig, zitj oetlèk van versjillendje gebroeke die bie det volksfieës huuere. Väör jóng – en aojer – kènjer fijn óm te wete!
Det nuuj dialect-laesbeukske weurtj op woonsdig 12 februari a.s. óm 16.00 oer in de bibliotheek aan de Bovenstestraot 11 in Ech officieel geprissenteerdj in aanwezigheid van die jóng carnavaliste vanwaege ’t thema: Vastelaovendj. Bie dees speciale gelaegenheid zal ouch wèthaojer Inge Minkenberg aanwezig zeen, en Astrid Frusch de sjriefster van ’t verhaol. ’t Verhaol is in ’t Echter dialect ómgezatj door Piet Aben en Ton van Wegberg. De beukskes zólle daonao op de bekèndje Veldeke-verkouppuntje te koup ligke väör € 17,50 p.st.
Laes verder bie: Oos taal > Beuk in ‘t dialek
Óm oos dialect in standj te haoje is ’t van groat belang om mit de kènjer/kleinkènjer plat te kalle. ’t Is henjig daobie gebroek te kènne make van sjoan väörlaesbeuk in de Limburgse taal. Lekker laeze mit ’n kèndj op sjoat, en same kieke nao de kluuerrieke teikeninge… Daoróm geuf Veldeke mit regelmaot beukskes oet.
D’r is ’n nuuj serie (väör-)laesbeukskes väör jóng kènjer in veurbereiding. Allemaol hanjele die óm Floortje, ’n Limburgs maedje det gaer op avontuur geitj. De beukskes zeen/waere gesjreve door Astrid Frusch mit teikeninge van Melanie Frissen. In versjillendje Veldke-kringe zeen de beukskes vertaaldj in hun eige dialect. De ieëste Echter oetgave is hertaaldj door Piet Aben en Ton van Wegberg en haet es óngerwerp de Vastelaovendj.
