In Zöstere is Evert waal haos bie ederein bekèndj. ’n Vraogbaak väör es m’n get äöver die plaats wiltj wete. Vanoet persuuenlike betrokkenheid, mer oet ’t verleje ouch ambtshalve (hae wèrkdje op ’t gemèndjehoes van destieds de zelfstandige gemeinte Zöstere), höbbe väöl minse kènne gebroek make en genete van zien rieke sjat aan kènnis en ervaring. Mer Zits is ouch waat w’r vandaag d’n daag ‘n “multi-talent” neume. Hae is ouch sjriever van gedichte, leedjes en verhaole. Daonaeve höbbe zien henj mènnig kunstwerk in klei, stein of bróns gemaaktj: van persoane, gesjiedkundige aafbeeldinge oet de historie van Suestra en nao eige fantasie.
Väörig jaor is op herhaoldj aandringe dit werk vasgelag in ’n prachtig book. En same mit cineast Ton Vranken is alles opgenómme in ’n film van ’n klein oer: “Boetseerwerk van Evert Zits”. De première woor väörig jaor bie de Natuurvrienden Susteren.
Filmmaker Ton Vranken – al eerder bie Veldeke mit zien natuurfilms äöver ’t Hout – kömtj de film zelf vertuuene. Hae zörgdje väör de opnames, de montage en ’t geluid. Det is ’n sjoan gehieël gewore.
De film weurtj deze aovendj ómliesj mit passendje meziek. Ónger angere leedjes, gesjreve door de gebr. Zits (Evert en zien vreug gestórve broor Piet), vertolktj door Jules Peters mit begeleiding van Ad Gijzels.
Dit belaoftj weer ‘ne sjoane Veldeke-aovendj te waere. In ’t kader van oetwisseling en samewèrking ouch toegankelik väör de leje van de Heemkundekring “Echter Landj” en de Natuurhistorische Vereniging “Pepijnsland”. En äöverige belangstèllendje zeen ouch van herte welkom; zie betale 3 euro entree. Op woonsdig 24 oktoaber a.s. óm 20.00 oer in de Pejjerhaof, Houtstraot 7.
